ഇസ്രായേല്‍ സൈന്യത്തിന്റെ വെടിവയ്പ്പില്‍ ഫലസ്തീന്‍ യുവതി കൊല്ലപ്പെട്ടു

ഗസ: ഇസ്രായേല്‍ സൈന്യത്തിന്റെ വെടിവയ്പ്പില്‍ ഫലസ്തീന്‍ യുവതി കൊല്ലപ്പെട്ടു. രണ്ട് മാധ്യമ പ്രവര്‍ത്തകരും ഒരു ആരോഗ്യപ്രവര്‍ത്തകനും ഉള്‍പ്പടെ 25 പ്രക്ഷോഭകര്‍ക്ക് പരിക്കേറ്റു. അമല്‍ മുസ്തഫ അബു സുല്‍ത്താന്‍(43) ആണ് കൊല്ലപ്പെട്ടതെന്ന് ഫലസ്തീന്‍ വക്താവ് അഷ്‌റഫ് അല്‍ ഖ്വിദ്ര പറഞ്ഞു. സമരം ശക്തമായ ഗസ-ഇസ്രായേല്‍ ബഫര്‍ സോണില്‍ വെള്ളിയാഴ്ച്ച വൈകീട്ടാണ് സൈന്യം വെടിയുതിര്‍ത്തതെന്ന് ഗസ ആരോഗ്യമന്ത്രാലയം അറിയിച്ചു.

ഇസ്രായേല്‍ അധിനിവേശത്തിനെതിരേ നടക്കുന്ന പ്രക്ഷോഭത്തിന്റെ ഭാഗമായി വെള്ളിയാഴ്ച്ച രാവിലെയാണ് ഗസ-ഇസ്രായേല്‍ ബഫര്‍ സോണില്‍ സമരം ശക്തിയാര്‍ജ്ജിച്ചത്. ആയിരക്കണക്കിന് ഫലസ്തീനികള്‍ സമരത്തില്‍ പങ്കാളികളായി. തങ്ങളുടെ വീടുകളിലേക്ക് മടങ്ങിപ്പോകാന്‍ അനുവദിക്കണമെന്നാവശ്യപ്പെട്ടായിരുന്നു പ്രക്ഷോഭം.