പി ജയരാജനെതിരേ ഫേസ്ബുക്ക് പോസ്റ്റിട്ട എംഎസ്എഫുകാര്‍ക്ക് മര്‍ദ്ദനം

കണ്ണൂര്‍: അരിയില്‍ ഷുക്കൂര്‍ വധക്കേസില്‍ സിബിഐ വധ ഗൂഢാലോചന കുറ്റം ചുമത്തി കുറ്റപത്രം നല്‍കിയതിനെ തുടര്‍ന്ന് സിപിഎം കണ്ണൂര്‍ ജില്ലാ സെക്രട്ടറി പി ജയരാജനെതിരേ സാമൂഹിക മാധ്യമങ്ങളില്‍ പ്രതികരിച്ച എംഎസ്എഫ് പ്രവര്‍ത്തകര്‍ക്കു നേരെ അക്രമം. സിപിഎം പ്രവര്‍ത്തകരുടെ ആക്രമണത്തില്‍ ഏഴു പേര്‍ക്ക് പരിക്കേറ്റു. തളിപ്പറമ്പിനടുക്ക് പടപ്പേങ്ങാട്ട് തിങ്കളാഴ്ച രാത്രിയാണു ആക്രമണമുണ്ടായത്. പടപ്പേങ്ങാട്ടെ മുബഷീര്‍(19), ഫാസില്‍ (17), ജമീസ്(18), സര്‍ഫ്രാസ്(18), റുവൈസ്(19), റമീസ്(18), പ്രായപൂര്‍ത്തിയാവാത്ത മറ്റൊരു വിദ്യാര്‍ഥി എന്നിവര്‍ക്കാണു പരിക്കേറ്റത്. ഇന്നലെ വൈകീട്ടാണ് ഏതാനും എംഎസ്എഫ് പ്രവര്‍ത്തകര്‍ പി ജയരാജനെതിരേ ഫേസ്ബുക്ക് പോസ്റ്റിട്ടത്. ആക്രമണത്തില്‍ പരിക്കേറ്റവര്‍ തളിപ്പറമ്പിലെ സ്വകാര്യ ആശുപത്രിയില്‍ ചികില്‍സയിലാണ്.