സോഷ്യല്‍ ഫോറം നിയമ സഹായത്തില്‍ ഷുഐബ് നാടണഞ്ഞു

അബഹ: സ്‌പോണ്‍സര്‍ ഹുറൂബ് ആക്കിയതിനെ തുടര്‍ന്ന് നാട്ടില്‍ പോവാനാവാതെ പ്രയാസപ്പെട്ടിരുന്ന മഞ്ചേരി സ്വദേശി ഷുഐബ് നാടണഞ്ഞു. സൗദിയിലെ അബഹക്കടുത്തുള്ള മഹായിലില്‍ എത്തി ഒരു വര്‍ഷം തികയുന്നതിന് മുമ്പുതന്നെ സ്‌പോണ്‍സര്‍ നേരത്തേ ഉറപ്പിച്ച ശമ്പളം ഉള്‍പ്പെടെയുള്ള കാര്യത്തില്‍ മലക്കം മറിയുകയായിരുന്നു. ശമ്പളവും ആനുകൂല്യങ്ങളും വെട്ടിക്കുറച്ചതോടെ സ്‌പോണ്‍സറുമായി അഭിപ്രായ വ്യത്യാസം ഉടലെടുക്കുകയും ഷുഐബിനെ ഹുറൂബ് ആക്കുകയും ചെയ്തു.

ഹുറൂബ് പിന്‍വലിക്കുന്നതിന് വേണ്ട നിരവധി ശ്രമങ്ങള്‍ സ്‌പോണ്‍സറുമായി നടത്തിയെങ്കിലും പരാജയപ്പെടുകയായിരുന്നു. തുടര്‍ന്നാണ് സോഷ്യല്‍ ഫോറം വെല്‍ഫെയര്‍ വിഭാഗം പ്രവര്‍ത്തകരായ ഹനീഫ് മഞ്ചേശ്വരം, അബ്ദുര്‍ റഹ്മാന്‍ പയ്യനങ്ങാടി എന്നിവരെ സമീപിക്കുന്നത്. ഇവരുടെ അബഹ ലേബര്‍ കോടതിയിലെ നിരന്തരമായ ഇടപെടലുകളാണ് ഷുഐബിനെ നാട്ടിലെത്താന്‍ സഹായിച്ചത്. നേരത്തേ സഹകരിക്കാതിരുന്ന സ്‌പോണ്‍സര്‍ രണ്ടു തവണയാണ് അബഹ ലേബര്‍ കോടതിയില്‍ ഹാജരായത്. ജിദ്ദയില്‍ നിന്നുള്ള ചാര്‍ട്ടേഡ് ഫ്‌ളൈറ്റില്‍ നാട്ടിലേക്ക് തിരിച്ച് ശുഐബ് ഇതിനുപിന്നില്‍ പ്രവര്‍ത്തിച്ച സോഷ്യല്‍ ഫോറം പ്രതിനിധികളെ നന്ദി അറിയിക്കാനും മറന്നില്ല.

Shuaib reached homeland in legal aid of Social Forum