ടി സിദ്ദിഖിനെതിരായ അപവാദ പ്രചാരണം; ഭാര്യ ദുബായ് പോലിസില്‍ പരാതി നല്‍കി

ദുബായ്: കോഴിക്കോട് ഡിസിസി പ്രസിഡന്റ് ടി സിദ്ദിഖിനെതിരായി സാമൂഹിക മാധ്യമങ്ങളില്‍ അപവാദ പ്രചാരണം നടത്തിയതിനെതിരേ ഭാര്യ പെരുത്തിയോട്ട് വളപ്പില്‍ ഷറഫുനീസ ദുബായ് പോലിസില്‍ പരാതി നല്‍കി. തന്നെയും കുടുംബത്തെയും സാമൂഹിക മാധ്യമങ്ങളിലൂടെ അപമാനിച്ചുവെന്നാണ് പരാതിയില്‍ ആരോപിച്ചത്. ദുബായ് പോലിസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.

ദുബായില്‍ പൊതു പരിപാടികള്‍ക്കായി എത്തിയ സിദ്ദിഖ് ബന്ധുക്കള്‍ക്കൊപ്പം ഡെസേര്‍ട്ട് സഫാരിക്ക് പോയിരുന്നു. ഇതിലെ വീഡിയോയും ചിത്രങ്ങളും ഉപയോഗിച്ച്, അപവാദ പ്രചാരണം നടക്കുന്നു എന്നാണ് പരാതിയുടെ ഉളളടക്കം. ഡെസേര്‍ട്ട് സഫാരിക്കിടെ ഇരുന്ന സ്ഥലത്ത് നിന്ന് എഴുന്നേല്‍ക്കുന്നതിനിടെ കാല് തെന്നി സിദ്ദിഖ് വീഴാന്‍ തുടങ്ങിയിരുന്നു. ഇത് മദ്യപിച്ചതാണെന്നാണ് ആരോപണം ഉയര്‍ന്നത്.