ജമാഅത്തെ ഇസ്‌ലാമി കേരള മുന്‍ അമീര്‍ ടി കെ അബ്ദുല്ലയുടെ വേര്‍പാടില്‍ പോപുലര്‍ ഫ്രണ്ട് അനുശോചിച്ചു

കോഴിക്കോട്: ജമാഅത്തെ ഇസ്‌ലാമിയുടെ കേരള ഘടകം നേതാവും പണ്ഡിതനുമായ ടി കെ അബ്ദുല്ലയുടെ വേര്‍പാടില്‍ പോപുലര്‍ ഫ്രണ്ട് ഓഫ് ഇന്ത്യ സംസ്ഥാന പ്രസിഡന്റ് സി പി മുഹമ്മദ് ബഷീര്‍ അനുശോചിച്ചു. ഇസ്‌ലാമികപരമായി സകലമേഖലകളിലും മികവ് തെളിയിച്ച വ്യക്തിത്വമായിരുന്നു അദ്ദേഹം. രണ്ടുതവണ ജമാഅത്തെ ഇസ്‌ലാമിയെ നയിച്ച അമീര്‍, ഇസ്‌ലാമിക പണ്ഡിതന്‍, ചിന്തകന്‍, ഉജ്ജ്വല വാഗ്മി, ആള്‍ ഇന്ത്യാ മുസ്‌ലിം പേഴ്‌സനല്‍ ലോ ബോര്‍ഡ് സ്ഥാപകാംഗം, ഇസ്‌ലാമിക വിജ്ഞാനകോശം ചീഫ് എഡിറ്റര്‍ തുടങ്ങി വിവിധ മേഖലകളില്‍ അദ്ദേഹം മികവ് പുലര്‍ത്തി. ഇസ്‌ലാമിക നവജാഗരണം ഇന്ത്യയില്‍ ശക്തിപ്പെട്ടപ്പോള്‍ സജീവമായി മുസ്‌ലിം യുവതയെ സ്വാധീനിച്ചൊരു പണ്ഡിതനായിരുന്നു അദ്ദേഹം.

ഖുര്‍ആനില്‍നിന്നും ഇസ്‌ലാമിക ചരിത്രത്തില്‍ നിന്നുമൊക്കെ പാഠങ്ങള്‍ ഉദ്ധരിച്ച് സമകാലിക വിഷയങ്ങളില്‍ നിലപാടുകളും പരിഹാരവും നിര്‍ദേശിക്കാന്‍ അദ്ദേഹത്തിന് കഴിഞ്ഞിരുന്നു. ഉറുദു കവിതകള്‍ ഉദ്ധരിച്ചുള്ള അദ്ദേഹത്തിന്റെ ശാന്തഗംഭീരമായ പ്രസംഗം ഏറെ സ്വീകാര്യത നേടിയിരുന്നു. കഴിഞ്ഞ ഏഴുപതിറ്റാണ്ടായി കര്‍മരംഗത്ത് സജീവമായിരുന്ന ടി കെ അബ്ദുല്ല സാഹിബിന് അറിവിനോട് വിശിഷ്യാ ഇസ്‌ലാമിക വിജ്ഞാനീയങ്ങളോട് അടങ്ങാത്ത തൃഷ്ണയുണ്ടായിരുന്നു. കുടുംബാംഗങ്ങളുടേയും സഹപ്രവര്‍ത്തകരുടേയും ദു:ഖത്തില്‍ പങ്കുചേരുന്നു. അദ്ദേഹത്തിന്റെ പരലോകജീവിതം നാഥന്‍ സന്തോഷകരമാക്കട്ടെ എന്ന് പ്രാര്‍ഥിക്കുന്നു- സി പി മുഹമ്മദ് ബഷീര്‍ അനുശോചന സന്ദേശത്തില്‍ അറിയിച്ചു.