തിരഞ്ഞെടുപ്പ് വാര്‍ത്ത നല്‍കാന്‍ മുഖ്യധാരാ മാധ്യമങ്ങള്‍ ആവശ്യപ്പെട്ടത് അരക്കോടിയെന്ന് വേങ്ങരയിലെ സ്വതന്ത്ര സ്ഥാനാര്‍ഥി സബാഹ്

വേങ്ങര: പി കെ കുഞ്ഞാലിക്കുട്ടിക്കെതിരേ ജനകീയ സ്വതന്ത്ര സ്ഥാനാര്‍ഥിയായി മല്‍സരിക്കുന്ന തന്റെ തിരഞ്ഞെടുപ്പ് വാര്‍ത്തകള്‍ നല്‍കാന്‍ മുഖ്യധാരാ മാധ്യമങ്ങള്‍ ആവശ്യപ്പെട്ടത് അരക്കോടി രൂപയാണെന്ന് സബാഹ് കുണ്ടുപുഴയ്ക്കല്‍. വേങ്ങരയില്‍ തിരഞ്ഞെടുപ്പ് പ്രചാരത്തിന്റെ അവസാന ഘട്ട പര്യടനത്തില്‍ സംസാരിക്കുകയായിരുന്നു അദ്ദേഹം. കുഞ്ഞാലിക്കുട്ടി മാധ്യമങ്ങളെ വിലക്കുവാങ്ങി തനിക്കെതിരേ കുപ്രചരണം നടത്തുകയാണ്.

വികസന നായകനെന്ന പെരുമ്പറ കൊട്ടി വോട്ടുചോദിക്കുന്ന യുഡിഎഫ് പ്രവര്‍ത്തകര്‍ വീണ്ടുവിചാരത്തിന് തയ്യാറാവണം. മണ്ഡലത്തിന് അനുവദിച്ച സര്‍ക്കാര്‍ കോളജ് സ്വന്തക്കാര്‍ക്ക് വില്‍പ്പന നടത്തിയ ആളെങ്ങനെയാണ് വികസന നായകനാവുന്നത്. കുഞ്ഞാലിക്കുട്ടിയുടെ വിജയത്തിന് വേണ്ടി ദുര്‍ബലസ്ഥാനാര്‍ഥിയെ നിര്‍ത്തിയ ഇടതുമുന്നണി നാണക്കേടില്‍നിന്ന് തലയൂരാന്‍ തന്റെ പേരില്‍ ബിനാമി ആരോപണമുന്നയിക്കുകയാണ്. ആത്മാഭിമാനമുള്ള ഇടതുമുന്നണി പ്രവര്‍ത്തകര്‍ തനിക്കൊപ്പമാണെന്നും സബാഹ് വ്യക്തമാക്കി.