വാഹന പരിശോധനയുടെ പേരില്‍ മലപ്പുറത്ത് യുവാവിന്റെ ഫോണ്‍ വനിതാ എസ്‌ഐ തട്ടിപ്പറിച്ചു; പ്രതിഷേധം ശക്തമായതോടെ തിരികെ നല്‍കി (വീഡിയോ)

മലപ്പുറം: വാഹന പരിശോധനയുടെ പേരില്‍ മലപ്പുറത്ത് യുവാവിന്റെ ഫോണ്‍ വനിതാ എസ് ഐ തട്ടിപ്പറിച്ച് വാങ്ങി. മലപ്പുറം ചെമ്മങ്കടവാണ് സംഭവം. മലപ്പുറം ട്രാഫിക് എസ് ഐ ഇന്ദു റാണിയാണ് അതിക്രമം കാണിച്ചത്. നാട്ടുകാര്‍ പോലിസ് ജീപ്പ് തടഞ്ഞ് ചോദ്യം ചെയ്തതോടെ ഫോണ്‍ തിരികെ നല്‍കി പോലിസ് തടിയൂരി.

ചെമ്മങ്കടവ് വില്ലേജ് ഓഫിസ് പരിസരത്തുവെച്ചാണ് വാഹന പരിശോധനക്കിടെ നാട്ടുകാരനായ യുവാവിന്റെ മൊബൈല്‍ ഫോണ്‍ വനിതാ എസ് ഐ തട്ടിപ്പറിച്ചു വാങ്ങിയത്. ബൈക്കിന് ഇന്‍ഷുറന്‍സ് ഇല്ലെന്ന പേരിലാണ് പിഴ ഈടാക്കുന്നതിന് പകരം മൊബൈല്‍ഫോണ്‍ തട്ടിപ്പറിച്ചത്. ഭാര്യ 9 മാസം ഗര്‍ഭണിയാണെന്നും വീട്ടില്‍ മറ്റാരും ഇല്ലെന്നും ഫോണ്‍ തിരികെ നല്‍കണമെന്നും യുവാവ് ആവശ്യപ്പെട്ടിരുന്നു. എന്നാല്‍ ഫോണ്‍ തിരികെ നല്‍കാതെ കൊണ്ടുപോകുകയായിരുന്നു ചെയ്തത്. ഇതോടെയാണ് നാട്ടുകാര്‍ ഇടപെട്ടത്. നാട്ടുകാരുടെ രോഷത്തിനു മുന്നില്‍ കീഴടങ്ങിയ എസ് ഐ ഫോണ്‍ തിരികെ നല്‍കി. സംഭവം സംബന്ധിച്ച ചോദ്യങ്ങള്‍ക്കൊന്നും ഉത്തരം പറയാതെ വേഗം സ്ഥലംവിടാനൊരുങ്ങിയ പോലിസിനെ തടഞ്ഞു നിര്‍ത്തി പറയാനുള്ളത് മുഴുവന്‍ പറഞ്ഞ് പ്രതിഷേധം അറിയിച്ച ശേഷമാണ് നാട്ടുകാര്‍ പോകാന്‍ അനുവദിച്ചത്.