ബിജെപി നടത്തുന്ന 'പരിവര്‍ത്തന്‍ യാത്ര'യുടെ സമാപനത്തോടനുബന്ധിച്ച് സംഘര്‍ഷം; ഏറ്റുമുട്ടി ബിജെപി തൃണമൂല്‍ കോണ്‍ഗ്രസ് പ്രവര്‍ത്തകര്‍

കൊല്‍ക്കത്ത: പശ്ചിമ ബംഗാള്‍ നിയമസഭാ തിരഞ്ഞെടുപ്പിന് മുന്നോടിയായി ബിജെപി നടത്തുന്ന 'പരിവര്‍ത്തന്‍ യാത്ര'യുടെ സമാപനത്തോടനുബന്ധിച്ച് സംഘര്‍ഷം. പ്രധാനമന്ത്രി നരേന്ദ്ര മോദി പങ്കെടുക്കുന്ന റാലിക്ക് തൊട്ടുമുമ്പാണ് സംഭവം. മധ്യ കൊല്‍ക്കത്തയിലെ ഗിരീഷ് പാര്‍ക്കിന് സമീപം ബിജെപി തൃണമൂല്‍ കോണ്‍ഗ്രസ് പ്രവര്‍ത്തകര്‍ തമ്മില്‍ ഏറ്റുമുട്ടുകയായിരുന്നു.

ഇരുവിഭാഗവും പരസ്പരം കല്ലെറിയുകയും മുദ്രാവാക്യം വിളികളുമായി തെരുവില്‍ ഏറ്റുമുട്ടുകയായിരുന്നു. യാതൊരു പ്രകോപനവുമില്ലാതെ തൃണമൂല്‍ പ്രവര്‍ത്തകര്‍ തങ്ങളെ ആക്രമിക്കുകയായിരുന്നുവെന്നും വാഹനങ്ങള്‍ തകര്‍ത്തുവെന്നായിരുന്നു ബിജെപിയുടെ വാദം.

എന്നാല്‍ ബിജെപി പ്രവര്‍ത്തകരാണ് ആദ്യം അസഭ്യം പറയുകയും കല്ലെറിയുകയും ചെയ്തതെന്നാണ് തൃണമൂല്‍ കോണ്‍ഗ്രസ് പ്രവര്‍ത്തകര്‍ പറയുന്നത്. പ്രാദേശിക നേതാക്കളുടെ വീടുകള്‍ക്ക് നേരെ ബിജെപി ആക്രമണം നടത്തിയെന്നും അവര്‍ പറഞ്ഞു. സംഘര്‍ഷം രൂക്ഷമായതോടെ പോലിസ് സ്ഥലത്തെത്തി സ്ഥിതിഗതികള്‍ നിയന്ത്രണവിധേയമാക്കി.