മലപ്പുറത്ത് വിദ്യാര്‍ഥിനി സ്വകാര്യ ബസ്സില്‍നിന്ന് തെറിച്ചുവീണ സംഭവം; ഡ്രൈവറുടെ ലൈസന്‍സ് സസ്‌പെന്റ് ചെയ്തു

മലപ്പുറം: തിരൂരങ്ങാടിയില്‍ വിദ്യാര്‍ഥിനി ബസ്സില്‍ നിന്ന് തെറിച്ചുവീണ സംഭവത്തില്‍ സ്വകാര്യബസ് ഡ്രൈവറുടെ ലൈസന്‍സ് മോട്ടോര്‍ വാഹനവകുപ്പ് സസ്‌പെന്റ് ചെയ്തു. അപകടകരമായ രീതിയില്‍ വാഹനമോടിച്ചെന്ന് വിലയിരുത്തിയാണ് നടപടി. കൂടാതെ പ്രോസിക്യൂഷന്‍ അടക്കമുള്ള നിയമനടപടികള്‍ സ്വീകരിക്കുമെന്നും ഉദ്യോഗസ്ഥര്‍ പറഞ്ഞു. തിരൂരങ്ങാടി ഗവണ്‍മെന്റ് സ്‌കൂളിലെ വിദ്യാര്‍ഥിനി കഴിഞ്ഞ ദിവസമാണ് ബസ്സില്‍ നിന്ന് തെറിച്ചുവീണത്.

ബസ് സ്റ്റോപ്പില്‍ നിര്‍ത്തിയതിനുശേഷം ബസ് മുന്നോട്ടെടുക്കുന്നതിനിടെയാണ് മുന്‍വശത്തെ വാതിലില്‍ നിന്ന് വിദ്യാര്‍ഥിനി പുറത്തേക്ക് വീണത്. ഈ ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിച്ചതോടെയാണ് മോട്ടോര്‍ വാഹന വകുപ്പിന്റെ നടപടി. ബസ്സില്‍നിന്നും വീണ വിദ്യാര്‍ഥിനിക്ക് ഗുരുതരമായ പരിക്കുകളില്ല. അപകടത്തെ തുടര്‍ന്ന് തിരൂരങ്ങാടി താലൂക്കിലെ സ്‌കൂള്‍ പരിസരങ്ങളില്‍ മോട്ടോര്‍ വാഹന വകുപ്പ് പരിശോധന കര്‍ശനമാക്കി.