യുദ്ധം ഇതുവരെ... ഇറാനെതിരായ യുഎസ്-ഇസ്രായേല്‍ ആക്രമണത്തിന്റെ അഞ്ചാം ദിവസം

ഇറാനെതിരായ ഏകപക്ഷീയമായ ഇസ്രായേല്‍-യുഎസ് ആക്രമണത്തോടെ ആരംഭിച്ച യുദ്ധം അഞ്ചാം ദിവസത്തിലേക്ക് കടന്നതോടെ ആക്രമണം കടുപ്പിച്ച് ഇരുപക്ഷവും. അമേരിക്കയും ഇസ്രായേലും ഇറാനില്‍ ആക്രമണം തുടരുന്നതിനിടെ ലെബനാനിലും ഇസ്രായേല്‍ തീവ്രമായ ബോംബാക്രമണം നടത്തി. ഇറാനിലെ സര്‍ക്കാര്‍, സൈനിക, സിവിലിയന്‍ കേന്ദ്രങ്ങളിലും കെട്ടിടങ്ങളിലും ഇസ്രായേല്‍-യുഎസ് സേന ശക്തമായ ബോംബാക്രമണം നടത്തി.

ഗള്‍ഫില്‍ യുഎസ് സൈനിക താവളങ്ങള്‍ക്ക് നേരെ ഇറാന്റെ പ്രതികാര ആക്രമണം തുടരുന്നതിനിടെ ചൊവ്വാഴ്ച ദുബായിലെ യുഎസ് കോണ്‍സുലേറ്റിന് സമീപം തീപിടുത്തമുണ്ടായി. ഇത് മിഡില്‍ ഈസ്റ്റിലെ സംഘര്‍ഷങ്ങള്‍ വര്‍ദ്ധിപ്പിച്ചു.

ഊര്‍ജ്ജ അടിസ്ഥാന സൗകര്യങ്ങളിലേക്കും നയതന്ത്ര കേന്ദ്രങ്ങളിലേക്കും ആക്രമണം വ്യാപിപ്പിച്ചുകൊണ്ട് ഇറാന്‍ നൂറുകണക്കിന് മിസൈലുകളും ഡ്രോണുകളും വിക്ഷേപിച്ചു.

ബുധനാഴ്ച അഞ്ചാം ദിവസത്തിലേക്ക് കടന്ന സംഘര്‍ഷം യുഎസില്‍ രാഷ്ട്രീയ ചര്‍ച്ചകള്‍ക്കും തുടക്കമിട്ടു. ഇറാനെ ആക്രമിക്കാനുള്ള ട്രംപിന്റെ തീരുമാനത്തെ പ്രതിപക്ഷ ഡെമോക്രാറ്റുകള്‍ ചോദ്യം ചെയ്തു.

ഇറാനില്‍

ലക്ഷ്യമിട്ട സ്ഥലങ്ങള്‍: പടിഞ്ഞാറന്‍ ടെത്റാനെ ലക്ഷ്യമിട്ടാണ് ഇസ്രായേല്‍-യുഎസ് സംയുക്ത ആക്രമണങ്ങള്‍ കൂടുതലും നടന്നത്. നഗരത്തിന് മുകളില്‍ കട്ടിയുള്ള പുകപടലങ്ങള്‍ കാണിക്കുന്ന വീഡിയോ ദൃശ്യങ്ങള്‍ പുറത്ത് വന്നു.

ആണവ കേന്ദ്രങ്ങള്‍: സൈനിക നടപടിക്കിടെയാണ് നതാന്‍സ് ആണവ കേന്ദ്രം ആക്രമിക്കപ്പെട്ടത്. എന്നാല്‍, റേഡിയോ ആക്ടീവ് ചോര്‍ച്ചയൊന്നും രേഖപ്പെടുത്തിയിട്ടില്ലെന്ന് ഇറാനിയന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു.

തിരിച്ചടിച്ച് ഇറാന്‍: പ്രതികാരമായി ഇറാന്‍ 500-ലധികം ബാലിസ്റ്റിക് മിസൈലുകളും 2,000 ഡ്രോണുകളും വിക്ഷേപിച്ചതായി യുഎസ് അഡ്മിറല്‍ ബ്രാഡ് കൂപ്പര്‍ വ്യക്തമാക്കി.

സൗദി അറേബ്യയിലെ യുഎസ് എംബസിയിലും യുഎഇയിലെ ദുബയിലെ യുഎസ് കോണ്‍സുലേറ്റിന് സമീപവും ആക്രമണം നടത്തി.

ഇസ്രായേല്‍ പൈലറ്റുമാര്‍ ഇറാനും തെഹ്റാനും മുകളിലൂടെ പറക്കുന്നുണ്ടെന്ന് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു സ്ഥിരീകരിച്ചു, ഇസ്രായേല്‍ ബലപ്രയോഗത്തിലൂടെ രാജ്യത്തെ ആക്രമിക്കുന്നത് തുടരുമെന്ന് പ്രസ്താവിച്ചു.

ആക്രമണം അഞ്ചാം ദിവസത്തിലേക്ക് കടന്നതോടെ ഇറാനില്‍ ഏകദേശം 800 പേരും ലെബനനില്‍ 50 പേരും കൊല്ലപ്പെട്ടതായി ഉദ്യോഗസ്ഥര്‍ റിപ്പോര്‍ട്ട് ചെയ്യുന്നു.

ഇസ്രായേലില്‍

ഇസ്രായേലിനുള്ളിലെ ആക്രമണങ്ങള്‍: ലെബനന്‍ സായുധ സംഘമായ ഹിസ്ബുല്ല വടക്കന്‍ പട്ടണമായ മെതുലയില്‍ ഇസ്രായേല്‍ സേനയ്ക്ക് നേരെ റോക്കറ്റ് ആക്രമണം നടത്തിയതായി അവകാശപ്പെട്ടു.

കൂടാതെ, ഇറാനുമായി സഖ്യത്തിലേര്‍പ്പെട്ട ഹിസ്ബുല്ല ഹൈഫയിലെ ഒരു നാവിക താവളത്തില്‍ മിസൈല്‍ ആക്രമണം നടത്തിയതായി പ്രഖ്യാപിച്ചു.

ഇസ്രായേലി സൈനിക നീക്കങ്ങള്‍: ഇറാനിലും ലെബനനിലും ലക്ഷ്യങ്ങളില്‍ സജീവമായി ബോംബാക്രമണം നടത്തി. തുടര്‍ച്ചയായ സംയുക്ത ആക്രമണത്തില്‍ ഇസ്രായേലാണ് പ്രധാന പങ്കാളി. ലെബനനില്‍, ഇസ്രായേലി വ്യോമാക്രമണങ്ങളില്‍ കുറഞ്ഞത് 50 പേര്‍ കൊല്ലപ്പെടുകയും 335 പേര്‍ക്ക് പരിക്കേല്‍ക്കുകയും ചെയ്തു.

ഹിസ്ബുല്ലക്കെതിരായ വ്യോമാക്രമണം: തെക്കന്‍ ലെബനനിലെ ഏകദേശം 60 ഹിസ്ബുല്ല ലക്ഷ്യങ്ങള്‍ ഇസ്രായേല്‍ സൈന്യം ആക്രമിച്ചു. ആയുധ സംഭരണ കേന്ദ്രങ്ങള്‍, കമാന്‍ഡ് സെന്ററുകള്‍, മിസൈല്‍ ലോഞ്ചറുകള്‍ എന്നിവ തകര്‍ത്തു.

ഗള്‍ഫ് രാജ്യങ്ങളില്‍

യുഎസ് സൈനിക താവളങ്ങളെ ലക്ഷ്യമാക്കി ഇറാന്‍ മിസൈലുകള്‍: യുഎസ് സൈനിക താവളങ്ങള്‍ ലക്ഷ്യമാക്കി ആക്രമണം ആരംഭിച്ച ഇറാന്‍ ഗള്‍ഫിലുടനീളമുള്ള ഊര്‍ജ്ജ അടിസ്ഥാന സൗകര്യങ്ങള്‍ക്ക് നേരെ ആക്രമണം അഴിച്ചുവിട്ടു. യുഎസ്-ഇസ്രായേല്‍ ആക്രമണങ്ങള്‍ തുടര്‍ന്നാല്‍ 'മേഖലയിലെ എല്ലാ സാമ്പത്തിക കേന്ദ്രങ്ങളെയും' ലക്ഷ്യമിടുമെന്ന് മുന്നറിയിപ്പ് നല്‍കി.

ഖത്തര്‍: ഖത്തര്‍ വ്യോമ പ്രതിരോധ സംവിധാനങ്ങള്‍ ദോഹയ്ക്ക് മുകളിലൂടെ ആകാശത്ത് പ്രൊജക്‌റ്റൈലുകള്‍ തടഞ്ഞു, ഇത് വലിയ ശബ്ദമുണ്ടാക്കി.

ഇസ്‌ലാമിക് റെവല്യൂഷണറി ഗാര്‍ഡ് കോര്‍പ്‌സിന് (ഐആര്‍ജിസി) വേണ്ടി പ്രവര്‍ത്തിക്കുന്ന 10 ചാരന്മാരെ അറസ്റ്റ് ചെയ്തതായും ഖത്തര്‍ അറിയിച്ചു.

സൗദി അറേബ്യ: റിയാദിലെ യുഎസ് എംബസിയില്‍ രണ്ട് ഡ്രോണുകള്‍ ആക്രമണം നടത്തിയതായും ഇത് തീപിടുത്തത്തിനും ചെറിയ നാശനഷ്ടങ്ങള്‍ക്കും കാരണമായതായും സൗദി അധികൃതര്‍ റിപ്പോര്‍ട്ട് ചെയ്തു.

ഒമാന്‍: മസ്‌കറ്റിലെ യുഎസ് എംബസി തങ്ങളുടെ ജീവനക്കാരോടും ഒമാനിലെ എല്ലാ അമേരിക്കന്‍ പൗരന്മാരോടും കൂടുതല്‍ അറിയിപ്പ് ഉണ്ടാകുന്നതുവരെ സ്ഥലത്ത് അഭയം തേടാനും സുരക്ഷിത സ്ഥലങ്ങള്‍ കണ്ടെത്താനും നിര്‍ദ്ദേശിച്ചു.

യുഎഇ തീരത്ത് നിന്ന് കപ്പല്‍ ഇടിച്ചു: യുഎഇയിലെ ഫുജൈറയില്‍ നിന്ന് 7 നോട്ടിക്കല്‍ മൈല്‍ കിഴക്ക് ഒരു കപ്പലില്‍ അജ്ഞാത പ്രൊജക്‌റ്റൈല്‍ ഇടിച്ചതായി ബ്രിട്ടീഷ് സമുദ്ര സുരക്ഷാ ട്രാക്കര്‍ (യുകെഎംടിഒ) റിപ്പോര്‍ട്ട് ചെയ്തു. ദുബയിലെ യുഎസ് കോണ്‍സുലേറ്റിന് സമീപം ഡ്രോണ്‍ ആക്രമണമുണ്ടായി.

അമേരിക്കയില്‍

യുഎസ് രാഷ്ട്രീയ നിലപാട്: വലിയ തോതിലുള്ള ആക്രമണം നടക്കുന്നു' എന്ന് ട്രംപ് പ്രസ്താവിച്ചു. ഇറാന് വളരെയധികം നാശനഷ്ടങ്ങള്‍ സംഭവിക്കാന്‍ പോകുന്നു എന്നും പ്രഖ്യാപിച്ചു.

കനത്ത സൈനിക നടപടി ഉണ്ടായിരുന്നിട്ടും, യുഎസ് നയിക്കുന്നേ ആക്രമണത്തിന് ഭരണമാറ്റം പ്രാഥമിക ലക്ഷ്യമല്ലെന്ന് ട്രംപ് വാദിക്കുന്നു. ഇറാനില്‍ നിന്നുള്ള ആരെങ്കിലും ഭരണതലപ്പത്ത് എത്തണമെന്നാണ് ഇപ്പോള്‍ ട്രംപ് പറയുന്നത്. ഇറാനില്‍ ഏത് വിധേനയും യുദ്ധം അവസാനിപ്പിച്ച് പുറത്ത് കടക്കാനുള്ള നീക്കമായി ഇത് വിലയിരുത്തപ്പെടുന്നു.

രാഷ്ട്രീയ പ്രത്യാഘാതങ്ങള്‍: ട്രംപ് ഭരണകൂടത്തില്‍ നിന്നുള്ള മാറിക്കൊണ്ടിരിക്കുന്ന ന്യായീകരണങ്ങള്‍ കാരണം ആഭ്യന്തരമായി, യുദ്ധം തീവ്രമായ രാഷ്ട്രീയ ചര്‍ച്ചകള്‍ക്ക് കാരണമായി. തെഹ്റാന്‍ ആദ്യം ആക്രമണം നടത്താന്‍ തയ്യാറെടുക്കുകയാണെന്ന് തിരിച്ചറിഞ്ഞതോടെയാണ് ആക്രമണങ്ങള്‍ക്ക് ഉത്തരവിട്ടതെന്ന് ട്രംപ് പറഞ്ഞു.

ഈ സൈനിക നടപടികള്‍ നടത്താന്‍ പ്രസിഡന്റ് ട്രംപിന് അധികാരമുണ്ടോ എന്ന് പരിശോധിക്കാന്‍ യുഎസ് സെനറ്റ് യുദ്ധ അധികാര നിയമത്തില്‍ വോട്ടെടുപ്പ് നടത്താന്‍ പോകുന്നു.

യുഎസ്-യുകെ നയതന്ത്ര വിള്ളല്‍: 'ഇത് ഞങ്ങളാണ് കൈകാര്യം ചെയ്യുന്നത്. വിന്‍സ്റ്റണ്‍ ചര്‍ച്ചിലല്ല' എന്ന് പ്രസ്താവിച്ചുകൊണ്ട് ട്രംപ് യുകെ പ്രധാനമന്ത്രി സര്‍ കെയര്‍ സ്റ്റാര്‍മറെ നിശിതമായി വിമര്‍ശിച്ചു. ഡീഗോ ഗാര്‍സിയയിലെ യുകെ-യുഎസ് സംയുക്ത താവളത്തില്‍ നിന്ന് ആക്രമണം നടത്താന്‍ യുഎസിനെ അനുവദിക്കാന്‍ സ്റ്റാര്‍മര്‍ വിസമ്മതിച്ചതിന് ശേഷമാണ് ഇത്.

കരയുദ്ധത്തെക്കുറിച്ച് നിയമനിര്‍മ്മാതാക്കള്‍ മുന്നറിയിപ്പ് നല്‍കുന്നു: സ്റ്റേറ്റ് സെക്രട്ടറി മാര്‍ക്കോ റൂബിയോയുടെ മൂന്ന് മണിക്കൂര്‍ നീണ്ട ബ്രീഫിംഗിനെത്തുടര്‍ന്ന്, ഡെമോക്രാറ്റിക് നിയമനിര്‍മ്മാതാക്കള്‍ അമേരിക്ക ഒരു നീണ്ട കരയുദ്ധത്തിലേക്ക് വലിച്ചിഴക്കപ്പെട്ടേക്കാമെന്ന് മുന്നറിയിപ്പ് നല്‍കുന്നു.

മരണസംഖ്യ: കുവൈത്തിലെ ഒരു സൈനിക കേന്ദ്രത്തില്‍ ഇറാന്‍ നടത്തിയ പ്രതികാര ആക്രമണത്തില്‍ കൊല്ലപ്പെട്ട നാല് അമേരിക്കന്‍ സൈനികരെ യുഎസ് തിരിച്ചറിഞ്ഞു. ഇതോടെ അഞ്ച് ദിവസത്തിനിടെ കൊല്ലപ്പെട്ട യുഎസ് സൈനികരുടെ എണ്ണം ആറായി. ഇസ്രായേല്‍ താല്‍പര്യങ്ങള്‍ക്ക് വേണ്ടി യുഎസ് സൈനികരെ കുരുതി കൊടുക്കുകയാണെന്ന വിമര്‍ശനവും ഉയര്‍ന്നു.