മംഗളൂരുവില്‍ മാധ്യമപ്രവര്‍ത്തകരുടെ കസ്റ്റഡി: വിചിത്ര വാദവുമായി പോലിസ് കമ്മീഷണര്‍

കണ്ണൂര്‍: രേഖകള്‍ പരിശോധിക്കാനാണ് മംഗലൂരുവില്‍ മാധ്യമപ്രകവര്‍ത്തകരെ കസ്റ്റഡിയിലെടുത്തതെന്ന വിശദീകരണവുമായി മംഗളൂരു പോലിസ്. രേഖകള്‍ പരിശോധിച്ച് വരികയാണ്. അതിന് ശേഷം ആവശ്യമായ രേഖകള്‍ ഉള്ളവരെ മാത്രം റിപ്പോര്‍ട്ടിംഗിന് അനുവദിക്കാമെന്നുമാണ് ഇപ്പോള്‍ പോലിസിന്റെ നിലപാട്. അതിനിടെ മലയാളി മാധ്യമപ്രവര്‍ത്തകരുടെ കസ്റ്റഡി സംബന്ധിച്ച് പോലിസ് കസ്റ്റഡിയില്‍ എടുത്തിരിക്കുന്നവരാരും ഔപചാരിക മാധ്യമ പ്രവര്‍ത്തകരല്ലെന്ന വിശദീകരണമാണ് കമ്മീഷണര് ഓഫീസില്‍ നിന്ന് ഇറക്കിയ വാര്‍ത്താ കുറിപ്പില്‍ ഉള്ളത്.

പ്രമുഖ മലയാളം ചാനലുകളുടേത് അടക്കം സ്ഥാപനത്തിന്റെ പേരും വിശദാംശങ്ങളും ചോദിച്ച് അറിഞ്ഞ ശേഷമാണ് പോലിസ് കസ്റ്റഡിയിലെടുത്തതെന്നിരിക്കെയാണ് വിചിത്ര വാദവുമായി വാര്‍ത്താ കുറിപ്പ് ഇറക്കിയത്.

അതേസമയം, കസ്റ്റഡിയിലായ മാധ്യമപ്രവര്‍ത്തകരുടെ സുരക്ഷ ഉറപ്പാക്കുമെന്ന് ഡിജിപി ലോക്‌നാഥ് ബെഹ്‌റ പ്രതികരിച്ചു. ഡിജിപിയും ചീഫ് സെക്രട്ടറിയും കര്‍ണാടക ഉന്നത ഉദ്യോഗസ്ഥരുമായി സംസാരിക്കുന്നുണ്ട്.

വലിയ എതിര്‍പ്പാണ് മംഗളൂരു പോലിസിന്റെ നടപടിക്കെതിരെ ഉയര്‍ന്നിട്ടുള്ളത്. കോഴിക്കോട് നഗരത്തില്‍ മാധ്യമ പ്രവര്‍ത്തകര്‍ പ്രതിഷേധ പ്രകടനം നടത്തി. അതിനിടെ കര്‍ണാടക അതിര്‍ത്തിയില്‍ കേരളത്തില്‍ നിന്നുള്ള വാഹനങ്ങള്‍ തടയുന്നുണ്ട്.