ലക്ഷദ്വീപില്‍ ചികിത്സ വൈകിയത് കാരണം യുവാവ് മരിച്ചതായി പരാതി

കൊച്ചി: ലക്ഷദ്വീപില്‍ ചികിത്സ വൈകിയത് കാരണം യുവാവ് മരിച്ചതായി പരാതി. ചെത്‌ലത് ദ്വീപ് നിവാസി കടപ്പുറത്ത്ഇല്ലം അബ്ദുല്‍ ഖാദറാണ് മരിച്ചത്. ബൈക്കപടത്തില്‍ പരിക്കേറ്റ ഖാദറിനെ 11 മണിക്കൂര്‍ വൈകിയാണ് എയര്‍ലിഫ്റ്റ് ചെയ്തത്. കൊച്ചിയിലേക്ക് പോകാതെ ഹെലികോപ്റ്റര്‍ കവരത്തിയില്‍ ഇറക്കിയെന്നും ആരോപണമുണ്ട്. സുഹൃത്ത് ബാദുഷയെ ഗുരുതര പരിക്കുകളോടെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ചെത്‌ലത് ദ്വീപിലെ തെക്ക് ഹെലിപാഡിനുസമീപം ബുധനാഴ്ച്ച വൈകീട്ടാണ് അപകടം നടന്നത്. അമിത വേഗതയിലെത്തിയ ബൈക്ക് വളവില്‍വെച്ച് നിയന്ത്രണം തെറ്റി തെന്നിമാറി മരത്തില്‍ ഇടിക്കുകയായിരുന്നു. അപകടത്തില്‍ ബൈക്ക് പൂര്‍ണമായും തകര്‍ന്നു. ഇടിയുടെ ആഘാതത്തില്‍ ഇരുവരും ബൈക്കില്‍ നിന്ന് തെറിച്ച് വീണു. അപകടം നടന്നയുടനെ ഓടി കൂടിയ നാട്ടുകാരണ് രക്ഷാപ്രവര്‍ത്തനം നടത്തിയത്.