സിപിഎം ലോക്കല്‍ കമ്മിറ്റി അംഗത്തിന്റെ കൊലപാതകം: മൂന്നു പ്രതികള്‍ പ്രതികള്‍ കസ്റ്റഡിയില്‍

പാലക്കാട്: പാലക്കാട് സിപിഎം ലോക്കല്‍ കമ്മിറ്റി അംഗത്തെ വെട്ടിക്കൊലപ്പെടുത്തിയ സംഭവത്തില്‍ മൂന്നു പേര്‍ പോലിസ് കസ്റ്റഡിയിലെന്ന് സൂചന. സിപിഎം മരുത റോഡ് ലോക്കല്‍ കമ്മിറ്റി അംഗമായ പാലക്കാട് കൊട്ടേക്കാട് കുന്നങ്കാട് സ്വദേശി ഷാജഹാനെ (39) ആറു പേരടങ്ങുന്ന സംഘമാണ് വെട്ടിക്കൊലപ്പെടുത്തിയതെന്നാണ് സൂചന. ഇതില്‍ മൂന്നു പേരെയാണ് പോലിസ് കസ്റ്റഡിയിലെടുത്തിട്ടുള്ളത്.

സംഘത്തില്‍ നേരത്തേ കൊലപാതകക്കേസില്‍ ശിക്ഷിയ്ക്കപ്പെട്ടവരും ഉണ്ടെന്നാണ് വിവരം. മരുതറോഡ് പഞ്ചായത്തില്‍, തിങ്കളാഴ്ച ഷാജഹാന്റെ സംസ്‌കാരം കഴിയുന്നതുവരെ, ഹര്‍ത്താലിന് സിപിഎം ആഹ്വാനം ചെയ്തിട്ടുണ്ട്.

ഞായറാഴ്ച രാത്രി 9.30ന് കുന്നങ്കാട് ഷാജഹാന്റെ വീടിനടുത്തുള്ള കടയ്ക്ക് പരിസരത്താണ് സംഭവം. സുഹൃത്തുമൊത്ത് കടയില്‍ സാധനം വാങ്ങുന്നതിനിടെ, അക്രമിസംഘം ഷാജഹാനെ വെട്ടിവീഴ്ത്തി രക്ഷപ്പെടുകയായിരുന്നു. കാലിനും തലയ്ക്കും ഗുരുതരമായി പരിക്കേറ്റ ഷാജഹാനെ ഉടനെ ജില്ലാ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. മൃതദേഹം ആശുപത്രി മോര്‍ച്ചറിയിലേക്ക് മാറ്റി.

പിന്നില്‍ ആര്‍എസ്എസ്. പ്രവര്‍ത്തകരാണെന്ന് സിപിഎം. ആരോപിച്ചു. എന്നാല്‍, കൊലപാതകത്തില്‍ പങ്കില്ലെന്നും സിപിഎമ്മിലെ വിഭാഗീയതയാണ് കൊലപാതകത്തിന് കാരണമെന്നും ബിജെപി സംസ്ഥാന ജനറല്‍ സെക്രട്ടറി സി കൃഷ്ണകുമാര്‍ പറഞ്ഞു.

രാഷ്ട്രീയകൊലപാതകമാണോ ഇതെന്ന് പോലിസ് സ്ഥിരീകരിച്ചിട്ടില്ല. ഷാജഹാന്റേത് ആസൂത്രിത കൊലപാതകമാണെന്ന് സിപിഎം നേതാവ് എ കെ ബാലന്‍ പ്രതികരിച്ചു. കൊട്ടേക്കാട് കുന്നങ്കാട് സാഹിബ് കുട്ടിയുടെ മകനാണ് ഷാജഹാന്‍.