കണ്ണൂരില്‍ എഴുപതുകാരന്റെ മരണം: ദിവസങ്ങളായി ഭക്ഷണം കഴിച്ചിട്ടില്ലെന്ന് പോസ്റ്റ്‌മോര്‍ട്ടം റിപ്പോര്‍ട്ട്

കണ്ണൂര്‍: കണ്ണൂര്‍ തെക്കി ബസാറില്‍ വീട്ടില്‍ മരിച്ച നിലയില്‍ കണ്ടെത്തിയ എഴുപതുകാരന്‍ ദിവസങ്ങളായി ഭക്ഷണം കഴിച്ചിട്ടില്ലെന്ന് പോസ്റ്റ്‌മോര്‍ട്ടം റിപ്പോര്‍ട്ട്. ഭാര്യയ്ക്കും മകള്‍ക്കുമൊപ്പം താമസിക്കുന്ന അബ്ദുള്‍ റാസിഖിന്റെ മൂന്ന് ദിവസം പഴക്കമുള്ള മൃതദേഹം വീട്ടിലെ മുറിയില്‍ നിന്നും പോലിസ് കണ്ടെടുക്കുകയായിരുന്നു. പരിയാരം മെഡിക്കല്‍ കോളജില്‍ നടത്തിയ പോസ്റ്റ്‌മോര്‍ട്ടത്തില്‍ രണ്ട് ദിവസമായി റാസിഖിന് ഭക്ഷണം കിട്ടിയില്ലെന്ന് വ്യക്തമായി. വയര്‍ ഒഴിഞ്ഞ് കിടക്കുകയാണെന്നും പിത്തഗ്രന്ധി മുഴുവനായി വികസിച്ചെന്നുമാണ് പോസ്റ്റ്‌മോര്‍ട്ടം റിപ്പോര്‍ട്ട്.

ചൊവ്വാഴ്ചയാണ് ആള്‍ താമസമുള്ള വീട്ടില്‍ നിന്നും എഴുപതുകാരന്റെ മൂന്ന് ദിവസം പഴക്കമുള്ള മൃതദേഹം പോലിസ് കണ്ടെത്തുന്നത്. ദിവസങ്ങളായി അബ്ദുള്‍ റാസിഖിന് ഭക്ഷണമോ വെള്ളമോ കൊടുത്തിട്ടില്ലെന്നാണ് വീട്ടിലുണ്ടായിരുന്ന ഭാര്യയും മകളും പോലിസിന് നല്‍കിയ മൊഴി. മുറിയില്‍ മലമൂത്ര വിസര്‍ജനം നടത്തുന്നത് കൊണ്ട് മരിച്ചത് അറിഞ്ഞില്ലെന്നും അസുഖബാധിതനായിരുന്നു എന്നുമാണ് വീട്ടുകാര്‍ പറഞ്ഞത്. എന്നാല്‍ പോസ്റ്റ്‌മോര്‍ട്ടം റിപ്പോര്‍ട്ടില്‍ കിടപ്പിലാകാന്‍ തക്ക അസുഖങ്ങളൊന്നും ഇയാള്‍ക്കില്ലെന്ന് വ്യക്തമായി. ഭാര്യയെയും മകളെയും വീണ്ടും ചോദ്യം ചെയ്യുമെന്ന് പോലിസ് അറിയിച്ചു. നിലവില്‍ അസ്വാഭാവിക മരണത്തിനാണ് കേസെടുത്തിട്ടുള്ളത്.

മരണമടഞ്ഞ റാസിഖിന് മറ്റു അസുഖങ്ങളിലെന്ന് പ്രദേശവാസിയായ അനില്‍കുമാര്‍ പറഞ്ഞു. എന്നാല്‍ എന്തുകൊണ്ടാണ് മരണവിവരം നേരത്തെ വീട്ടുകാര്‍ പുറത്തു പറയാത്തതെന്തെന്ന സംശയം പൊലിസിനും നാട്ടുകാര്‍ക്കുണ്ട്. ഏറെക്കാലമായി അബുദാബിയിലായിരുന്നു റാസിഖ്.