മിലാന് ആദ്യ തോല്‍വി; പോചീടിനോയ്ക്ക് കീഴില്‍ പിഎസ്ജിക്ക് സമനില

മിലാന്‍: ഇറ്റാലിയന്‍ സീരി എയിലെ ഒന്നാം സ്ഥാനക്കാരായ എ സി മിലാന് സീസണിലെ ആദ്യ തോല്‍വി. മുന്‍ ചാംപ്യന്‍മാരായ യുവന്റസാണ് മിലാന്റെ ഈ സീസണിലെ അപരാജിത കുതിപ്പിന് വിരാമമിട്ടത്. 3-1നാണ് യുവന്റസിന്റെ ജയം. സ്റ്റാര്‍ സ്‌ട്രൈക്കര്‍ സാള്‍ട്ടണ്‍ ഇബ്രാഹിമോവിച്ചില്ലാതെയാണ് മിലാന്‍ ഇറങ്ങിയത്. ഫെഡറികോ ഷിയാസയുടെ ഡബിള്‍ ഗോള്‍ നേട്ടവും മക്കെനിയുടെ ഒരു ഗോളുമാണ് യുവന്റസിന് തുണയായത്. രണ്ട് ഗോളുകള്‍ക്ക് അസിസ്റ്റ് നല്‍കിയത് ഡിബാലയാണ്. മറ്റൊരു മല്‍സരത്തില്‍ രണ്ടാം സ്ഥാനത്തുള്ള ഇന്റര്‍മിലാനെ സംമ്പഡോറിയ 2-1ന് തോല്‍പ്പിച്ചു. മൂന്നാം സ്ഥാനക്കാരായ റോമ ക്രോട്ടണെ 3-1ന് തോല്‍പ്പിച്ചു. യുവന്റസ് നാലാം സ്ഥാനത്താണ്.

ഫ്രഞ്ച് ലീഗില്‍ പുതിയ കോച്ച് പോച്ചീടിനോയ്ക്ക് കീഴിലെ ആദ്യ മല്‍സരത്തില്‍ പിഎസ്ജിക്ക് സമനില. സെയ്ന്റ് ഐറ്റീന് മുന്നില്‍ 1-1 സമനിലയാണ് പിഎസ്ജി പിടിച്ചത്. ഹൗമൗമയിലൂടെ സെയ്ന്റാണ് ആദ്യം ലീഡെടുത്തത്. തുടര്‍ന്ന് 22ാം മിനിറ്റില്‍ മോയിസ് കീനിലൂടെ പിഎസ്ജി സമനില പിടിക്കുകയായിരുന്നു. ലീഗില്‍ ലിയോണ്‍ ഒന്നാം സ്ഥാനത്തും പിഎസ്ജി രണ്ടാം സ്ഥാനത്തും ആണുള്ളത്.