നെയ്മര്‍ വന്നാല്‍ ബാഴ്സലോണയുമായി ആജീവനാന്ത കരാര്‍ പരിഗണിക്കാം: മെസ്സി

മാഡ്രിഡ്: ബാഴ്‌സലോണയുമായുള്ള തന്റെ കരാര്‍ പുതുക്കണമെങ്കില്‍ നെയ്മറെ ടീമിലെത്തിക്കണമെന്ന് ലയണല്‍ മെസ്സി. മെസ്സിയുടെ കരാര്‍ 2021ലാണ് അവസാനിക്കുന്നത്. ഇത് നീട്ടാന്‍ ക്ലബ്ബ് ശ്രമം നടത്തുന്നതിനിടെയാണ് മെസ്സിയുടെ ഞെട്ടിക്കുന്ന ആവശ്യം. താന്‍ ടീമില്‍ ആജീവനാന്തം തുടരണമെങ്കില്‍ പിഎസ്ജി താരം നെയ്മറെ ഉടന്‍ ടീമിലെത്തിക്കണമെന്നാണ് മെസ്സി ആവശ്യപ്പെട്ടിരിക്കുന്നത്. നിലവില്‍ പിഎസ്ജി മുന്നോട്ട് വച്ച തുക നല്‍കാന്‍ കഴിയാത്തതിനാല്‍ ബാഴ്‌സലോണയിലേക്കുള്ള നെയ്മറുടെ വരവ് പാതിവഴിയിലാണ്. എന്നാല്‍ ഏത് വിധേനയും നെയ്മറെ ടീമിലെത്തിക്കണമെന്നും നെയ്മര്‍ കൂടി ടീമിലെത്തിയാല്‍ ക്ലബ്ബിന് ചാംപ്യന്‍സ് ലീഗ് സ്വന്തമാക്കാമെന്നാണ് മെസ്സിയുടെ അഭിപ്രായം. ബാഴ്‌സയില്‍ നിന്നാണ് നെയ്മര്‍ രണ്ട് വര്‍ഷം മുമ്പ് പിഎസ്ജിയിലേക്ക് ചേക്കേറിയത്. മെസ്സി, സുവരാസ്, നെയ്മര്‍ എന്നീ കൂട്ടുകെട്ട് ലോകത്തിലെ മികച്ച കൂട്ട്‌കെട്ടായിരുന്നു. എംഎസ്എന്‍ എന്നാണ് ഈ കൂട്ട്‌കെട്ട് അറിയപ്പെട്ടത്.