ന്യൂസിലന്റിന് മുന്നില്‍ 239 റണ്‍സ് വിജയലക്ഷ്യം; അഭിഷേക് ശര്‍മയും റിങ്കു സിങ്ങും മിന്നി

നാഗ്പുര്‍: അഭിഷേക് ശര്‍മയും അവസാന ഓവറുകളില്‍ റിങ്കു സിങ്ങും കത്തിക്കയറിയപ്പോള്‍ ന്യൂസിലന്‍ഡിനെതിരായ ഒന്നാം ട്വന്റി-20-യില്‍ ഇന്ത്യയ്ക്ക് മികച്ച സ്‌കോര്‍. 20 ഓവറില്‍ ഏഴു വിക്കറ്റ് നഷ്ടത്തില്‍ ഇന്ത്യ 238 റണ്‍സെടുത്തു.

ഓപ്പണര്‍ അഭിഷേക് ശര്‍മയുടെ വെടിക്കെട്ട് ബാറ്റിങ്ങായിരുന്നു ഇന്ത്യന്‍ ഇന്നിങ്സിന്റെ പ്രത്യേകത. വെറും 35 പന്തുകള്‍ നേരിട്ട അഭിഷേക് എട്ടു സിക്സും അഞ്ച് ഫോറുമടക്കം 84 റണ്‍സെടുത്തു.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയുടെ തുടക്കം അത്ര മികച്ചതായിരുന്നില്ല. രണ്ടാം ഓവറില്‍ സഞ്ജു സാംസണെയും (10), മൂന്നാം ഓവറില്‍ ഇഷാന്‍ കിഷനെയും (8) നഷ്ടമായ ഇന്ത്യ രണ്ടിന് 27 റണ്‍സെന്ന നിലയിലായിരുന്നു. എന്നാല്‍ മൂന്നാം വിക്കറ്റില്‍ ക്യാപ്റ്റന്‍ സൂര്യകുമാറുമൊത്ത് അഭിഷേക് 47 പന്തില്‍ നിന്ന് 99 റണ്‍സിന്റെ കൂട്ടുകെട്ടുണ്ടാക്കിയതോടെ കിവീസ് വിറച്ചു. 11-ാം ഓവറില്‍ സൂര്യയെ പുറത്താക്കി ക്യാപ്റ്റന്‍ മിച്ചല്‍ സാന്റ്നറാണ് ഈ കൂട്ടുകെട്ട് പൊളിച്ചത്. സമീപകാലത്ത് റണ്‍സ് കണ്ടെത്താന്‍ ബുദ്ധിമുട്ടിയിരുന്ന സൂര്യ 22 പന്തില്‍ നിന്ന് 32 റണ്‍സെടുത്താണ് പുറത്തായത്. ഒരു സിക്സും നാല് ഫോറുമടങ്ങുന്നതായിരുന്നു ക്യാപ്റ്റന്റെ ഇന്നിങ്സ്.

പിന്നാലെ 12-ാം ഓവറില്‍ അഭിഷേകും മടങ്ങിയതോടെ ഇന്ത്യയുടെ സ്‌കോറിങ് റേറ്റ് താഴ്ന്നു. ഇതിനിടെ ശിവം ദുബെ (9) കാര്യമായ സംഭാവനകളില്ലാതെ മടങ്ങി. 16 പന്തില്‍ നിന്ന് 25 റണ്‍സടിച്ച ഹാര്‍ദിക്കാകട്ടെ ഒരു സിക്സറിനുള്ള ശ്രമത്തില്‍ പുറത്താകുകയും ചെയ്തു.ഒടുവില്‍ അവസാന ഓവറുകളില്‍ റിങ്കു സിങ് നടത്തിയ വെടിക്കെട്ടാണ് ഇന്ത്യന്‍ സ്‌കോര്‍ 238-ല്‍ എത്തിച്ചത്. വെറും 20 പന്തുകള്‍ നേരിട്ട റിങ്കു മൂന്ന് സിക്സും നാല് ഫോറുമടക്കം 44 റണ്‍സോടെ പുറത്താകാതെ നിന്നു. ഡാരില്‍ മിച്ചല്‍ എറിഞ്ഞ അവസാന ഓവറില്‍ 21 റണ്‍സാണ് റിങ്കു അടിച്ചെടുത്തത്.