കെസിഎല്‍; വിജയത്തുടര്‍ച്ചക്ക് കൊച്ചി ബ്ലൂ ടൈഗേഴ്‌സ് ഇന്നിറങ്ങും; സഞ്ജുവും ക്രീസില്‍; എതിരാളികള്‍ തൃശൂര്‍ ടൈറ്റന്‍സ്

തിരുവനന്തപുരം: കേരള ക്രിക്കറ്റ് ലീഗ് സീസണ്‍ രണ്ടിലെ ഇന്നത്തെ ആദ്യ മല്‍സരത്തില്‍ കൊച്ചി ബ്ലൂ ടൈഗേഴ്‌സും തൃശൂര്‍ ടൈറ്റന്‍സും ഏറ്റുമുട്ടും. കളിച്ച മൂന്ന് മല്‍സരങ്ങളും ജയിച്ച് ആറ് പോയന്റുമായി പോയന്റ് പട്ടികയില്‍ ഒന്നാം സ്ഥാനത്താണ് കൊച്ചി ബ്ലൂ ടൈഗഴ്‌സ്. മൂന്ന് കളികളില്‍ രണ്ട് ജയവും ഒരു തോല്‍വിയും അടക്കം നാല് പോയന്റുള്ള തൃശൂര്‍ മൂന്നാം സ്ഥാനത്താണ്. രണ്ടാം മല്‍സരത്തില്‍ ആലപ്പി റിപ്പിള്‍സ് കാലക്കറ്റ് ഗ്ലോബ് സ്റ്റാര്‍സിനെ നേരിടും. ഒരു മല്‍സരം മാത്രം ജയിച്ച ഇരു ടീമുകള്‍ക്കും രണ്ട് പോയന്റ് വീതമാണുള്ളത്. എന്നാല്‍ മികച്ച റണ്‍ ശരാശരിയുള്ള ഗ്ലോബ് സ്റ്റാര്‍സ് നാലാം സ്ഥാനത്തും ആലപ്പി റിപ്പിള്‍സ് ആറാം സ്ഥാനത്തുമാണ്.

കഴിഞ്ഞ മല്‍സരത്തില്‍ ഓപ്പണറായി ഇറങ്ങിയ വെടിക്കെട്ട് സെഞ്ചുറിയിലൂടെ ടീമിന്റെ വിജിയത്തില്‍ നിര്‍ണായക പങ്കുവഹിച്ച സഞ്ജു സാംസണായിരിക്കും ഇന്നത്തെ ആദ്യ മല്‍സരത്തില്‍ ശ്രദ്ധാകേന്ദ്രം. ഏഷ്യാ കപ്പ് ടീമില്‍ ഓപ്പണറായി ഇടം നേടിയ സഞ്ജു ഇന്ന് തൃശൂരിനെതിരെയും ഓപ്പണറായി ഇറങ്ങാനാണ് സാധ്യത. കെസിഎല്ലിലെ ആദ്യ രണ്ട് മല്‍സരങ്ങളില്‍ സഞ്ജു മധ്യനിരയിലായിരുന്നു കളിച്ചത്. ആദ്യ മല്‍സരത്തില്‍ ബാറ്റ് ചെയ്യാനിറങ്ങാതിരുന്ന സഞ്ജു ആലപ്പി റിപ്പിള്‍സിനെതിരായ രണ്ടാം മല്‍സരത്തില്‍ ആറാമനായി ക്രീസിലെത്തിയെങ്കിലും 22 പന്തില്‍ 13 റണ്‍സ് മാത്രം നേടാനെ കഴിഞ്ഞുള്ളു. ഒരു ബൗണ്ടറി പോലും നേടാതെ സഞ്ജു മടങ്ങിയത് ആരാധകരെ നിരാശരാക്കുകയും ചെയ്തിരുന്നു.

എന്നാല്‍ ഏരീസ് കൊല്ലം സെയ്ലേഴ്‌സിനെതിരായ മൂന്നാം മല്‍സരത്തില്‍ ഓപ്പണറായി തിരിച്ചെത്തിയ സഞ്ജു 51 പന്തില്‍ 121 റണ്‍സെടുത്ത് ടീമിന്റെ വിജയത്തില്‍ സുപ്രധാന പങ്കുവഹിച്ചു. ആദ്യം ബാറ്റ് ചെയ്ത കൊല്ലം 20 ഓവറില്‍ 236 റണ്‍സടിച്ചിട്ടും സഞ്ജുവിന്റെ വെടിക്കെട്ട് സെഞ്ചുറിയാണ് കൊച്ചിക്ക് വിജയം സമ്മാനിച്ചത്.