Top

താരങ്ങളെ പിടിവിടാതെ കൊവിഡ്; ഐപിഎല്‍ 2021 ഉപേക്ഷിച്ചു

ഏറ്റവും പുതിയതായി സണ്‍റൈസേഴ്‌സിന്റെ അമിത് മിശ്രയ്ക്കും വൃദ്ധിമാന്‍ സാഹയ്ക്കും രോഗം സ്ഥിരീകരിച്ചിരുന്നു.

താരങ്ങളെ പിടിവിടാതെ കൊവിഡ്; ഐപിഎല്‍ 2021 ഉപേക്ഷിച്ചു
X


ഡല്‍ഹി: ഐപിഎല്‍ ബയോ ബബ്‌ളിനെയും മറികടന്ന് നിരവധി താരങ്ങളെ കൊവിഡ് പിടികൂടിയതോടെ ഈ സീസണിലെ ഐപിഎല്‍ ഉപേക്ഷിച്ചു. ബിസിസഐയാണ് ഇക്കാര്യം അറിയിച്ചത്. ഏറ്റവും പുതിയതായി സണ്‍റൈസേഴ്‌സിന്റെ അമിത് മിശ്രയ്ക്കും വൃദ്ധിമാന്‍ സാഹയ്ക്കും ഇന്ന്് രോഗം സ്ഥിരീകരിച്ചിരുന്നു. ഇതോടെയാണ് ഐപിഎല്‍ ഉപേക്ഷിക്കാന്‍ ബിസിസിഐ തീരുമാനിച്ചത്. ഡല്‍ഹിയില്‍ ഇന്ന് സണ്‍റൈസേഴ്‌സ്-മുംബൈ ഇന്ത്യന്‍സ് മല്‍സരം നടക്കാനിരിക്കെയാണ് ബിസിസിഐയുടെ തീരുമാനം. കഴിഞ്ഞ ദിവസമാണ് കൊല്‍ക്കത്തയുടെ സന്ദീപ് വാര്യര്‍ , വരുണ്‍ ചക്രവര്‍ത്തി എന്നിവര്‍ക്ക് രോഗം സ്ഥിരീകരിച്ചത്. തുടര്‍ന്ന് ടീം ക്വാറന്റീനില്‍ പ്രവേശിച്ചിരുന്നു. ഇവരുമായി 29ന് ഏറ്റുമുട്ടിയ ഡല്‍ഹി ക്യാപിറ്റല്‍സിനോടും ബിസിസിഐ കഴിഞ്ഞ ദിവസം ക്വാറന്റീനില്‍ പ്രവേശിക്കാന്‍ ആവശ്യപ്പെട്ടിരുന്നു. ഞായറാഴ്ച ഡല്‍ഹിയുമായി ഏറ്റുമുട്ടിയ പഞ്ചാബ് കിങ്‌സിനോട് ക്വാറന്റീനില്‍ പ്രവേശിക്കാന്‍ ആവശ്യപ്പെട്ടിരുന്നു. സണ്‍റൈസേഴ്‌സ് താരങ്ങള്‍ക്ക് രോഗം സ്ഥിരീകരിച്ചതോടെ അവരുമായി മെയ്യ് രണ്ടിന് ഏറ്റുമുട്ടിയ രാജസ്ഥാന്‍ താരങ്ങള്‍ക്കും കൊവിഡ് ഭീഷണിയാവും.


കഴിഞ്ഞ ദിവസം ചെന്നൈ സൂപ്പര്‍ കിങ്‌സിന്റെ രണ്ട് സ്റ്റാഫുകള്‍ക്കും ബൗളിങ് കോച്ച് ബാലാജിക്കും രോഗം സ്ഥിരീകിരിച്ചിരുന്നു. ചെന്നൈ മുംബൈ ഇന്ത്യന്‍സിനോട് മെയ്യ് ഒന്നിന് ഏറ്റുമുട്ടിയിരുന്നു. കൂടാതെ ഡല്‍ഹിയിലെ അഞ്ച് ഗ്രൗണ്ട് സ്റ്റാഫുകള്‍ക്കും ഇന്നലെ രോഗം കണ്ടെത്തിയിരുന്നു. ഇതോടെ കൂടുതല്‍ താരങ്ങള്‍ക്ക് രോഗം പടരുമെന്ന ഭീതിയിലാണ് ബിസിസിഐ സീസണ് താല്‍ക്കാലികമായി പരിസമാപ്തി കുറിച്ചത്.


ഇന്ത്യയില്‍ ക്രമാധീതമായി കൊവിഡ് കേസുകളും മരണങ്ങളും ഉയര്‍ന്നിട്ടും ഐപിഎല്ലുമായി ബിസിസിഐ മുന്നോട്ട് പോയതിന് വന്‍ വിമര്‍ശനങ്ങള്‍ ഉയര്‍ന്നിരുന്നു. എന്നാല്‍ വിമര്‍ശനങ്ങള്‍ തള്ളി ബിസിസിഐ ടൂര്‍ണ്ണമെന്റുമായി മുന്നോട്ട് പോവുകയായിരുന്നു. തുടക്കത്തില്‍ തന്നെ ഐപിഎല്‍ താരങ്ങളെ രോഗം പിടികൂടിയിരുന്നു. എന്നാല്‍ ഇത് വകവയ്ക്കാതെ ആയിരുന്നു ബിസിസിഐയുടെ നടപടി.




Next Story

RELATED STORIES

Share it