കുവൈത്തിൽ ഇസ്രായീൽ ഉൽപ്പന്നം വിൽപ്പന നടത്തിയ കട മന്ത്രാലയം അടച്ചു പൂട്ടി

കുവൈത്ത്‌ സിറ്റി: കുവൈത്തിൽ ഇസ്രായീൽ ഉൽപ്പന്നം വിൽപ്പന നടത്തിയ ഒരു കട ഉൾപ്പെടെ വിവിധ നിയമ ലംഘനങ്ങൾ നടത്തിയ 8 കച്ചവട സ്ഥാപനങ്ങൾ വാണിജ്യ വ്യവസായ മന്ത്രാലയം അടച്ചു പൂട്ടി. ഷുവൈഖ്‌ വ്യവസായ മേഖലയിൽ പ്രവർത്തിക്കുന്ന വാഹന സ്പെയർ പാർട്സ് വിൽപന കേന്ദ്രമാണ് ഇസ്രായീൽ ഉൽപ്പന്നം വിൽപന നടത്തിയതിന് അടച്ചു പൂട്ടിയത്‌.

ഉപഭോക്താവിൽ നിന്നും ലഭിച്ച വിവരത്തിന്റെ അടിസ്ഥാനത്തിലാണു നടപടി. ഇസ്രായീൽ നിർമ്മിത തെർമ്മോ സ്റ്റാറ്റ്‌ ഉപകരണമാണു സ്ഥാപനത്തിൽ വിൽപന നടത്തിയത്‌. ഇവയുടെ 77 പെട്ടികൾ വാണിജ്യ മന്ത്രാലയം പിടിച്ചെടുക്കുകയും കേസ്‌ പ്ബ്ലിക്‌ പ്രോസ്ക്യൂഷനു കൈമാറുകയും ചെയ്തു. യു.എഇ , ബഹറൈൻ മുതലായ രാജ്യങ്ങൾ ഇസ്രായീലുമായുള്ള ബന്ധം സാധാരണ നിലയിലേക്ക്‌ പുനസ്ഥാപിച്ചുവെങ്കിലും വിഷയത്തിൽ കുവൈത്ത്‌ പതിറ്റാണ്ടുകളായി തുടരുന്ന നിലപാടിൽ മാറ്റം വരുത്തിയിട്ടില്ല.