ഒറ്റപ്പെട്ട സംഭവക്കാരിൽനിന്ന് നാടിനെ രക്ഷിക്കണ്ടേ; മുഖ്യമന്ത്രിയെ പരോക്ഷമായി വിമർശിച്ച് ജേക്കബ് തോമസ്

തിരുവനന്തപുരം: മുഖ്യമന്ത്രി പിണറായി വിജയനെ പരോക്ഷമായി വിമർശിച്ച് ഡിജിപി ഡോ.ജേക്കബ് തോമസ് ഐപിഎസ്. ഫേസ്ബുക്ക് പേജിലൂടെയായിരുന്നു വിമർശനം.

കഴിഞ്ഞ ദിവസം നിയമസഭയിലെ പ്രസംഗത്തിനിടെ വടകര ലോക്സഭാ മണ്ഡലത്തിലെ സ്വതന്ത്ര സ്ഥാനാർഥിയും മുൻ സിപിഎം പ്രാദേശിക നേതാവുമായിരുന്ന സി ഒ ടി നസീറിനെതിരെയുണ്ടായ ആക്രമണത്തെ മുഖ്യമന്ത്രി ഒറ്റപ്പെട്ട സംഭവമെന്ന് വിശേഷിപ്പിച്ചിരുന്നു. മുഖ്യമന്ത്രിയുടെ ഈ പരാമർത്തെ വിമർശിച്ചാണ് ജേക്കബ് തോമസിന്റെ ഫേസ്ബുക്ക് കുറിപ്പ്.

ഒറ്റപ്പെട്ട സംഭവങ്ങളുടെ പരമ്പര പുരോഗമിക്കുന്നുണ്ടല്ലോ. ഒറ്റപ്പെട്ട സംഭവക്കാരിൽനിന്ന് ഈ നാട് നമുക്ക് രക്ഷിക്കേണ്ടേ എന്നാണ് കുറിപ്പിൽ ജേക്കബ് തോമസ് കുറിച്ചത്. മുമ്പും പലവിഷയങ്ങളിലും സർക്കാരിനെ പരോക്ഷമായി വിമർശിച്ച് ജേക്കബ് തോമസ് രംഗത്തു വന്നിരുന്നു.