നാഗേശ്വര റാവുവിന്റെ ഭാര്യയുടെ കമ്പനിയില്‍ പോലിസ് റെയ്ഡ്

കൊല്‍ക്കത്ത: കേന്ദ്രവും സിബിഐയും ബംഗാള്‍ സര്‍ക്കാരും തമ്മിലുള്ള തര്‍ക്കം മൂര്‍ച്ഛിക്കവേ, സിബിഐ മുന്‍ ഇടക്കാല ഡയറക്ടര്‍ നാഗേശ്വര റാവുവിന്റെ ഭാര്യ പങ്കാളിയായ കമ്പനിയില്‍ കൊല്‍ക്കത്ത പോലിസിന്റെ റെയ്ഡ്. നാളെ കൊല്‍ക്കത്ത പോലീസ് കമ്മീഷണര്‍ രാജീവ് കുമാര്‍ സിബിഐക്ക് മുന്നില്‍ ചോദ്യം ചെയ്യലിന് ഹാജരാവാനിരിക്കെയാണ് കൊല്‍ക്കത്ത പോലിസിന്റെ റെയ്‌ഡെന്നതാണ് ശ്രദ്ദേയമാവുന്നത്. രാജീവ് കുമാറിനെ ചോദ്യം ചെയ്യാനായി കമ്മീഷണര്‍ ഓഫിസിലെത്തിയ സിബിഐ ഉദ്യോഗസ്ഥരും കൊല്‍ക്കത്ത പോലിസും തമ്മില്‍ തര്‍ക്കമുണ്ടായിരുന്നു. സിബിഐ ഉദ്യോഗസ്ഥരെ പോലിസ് കസ്റ്റഡിയിലെടുക്കുകയും പിന്നീട് കേന്ദ്രവും മമതയും തമ്മിലുള്ള തുറന്ന ഏറ്റുമുട്ടലിലേക്കു ഇതു വഴിമാറുകയും ചെയ്തിരുന്നു. കള്ളപ്പണം വെളുപ്പിച്ചതുമായി ബന്ധപ്പെട്ടു ഗുരുതര ആരോപണം ഉയര്‍ന്നിരുന്ന കമ്പനിയാണ് നാഗേശ്വര റാവുവിന്റെ ഭാര്യ പങ്കാളിയായ കമ്പനി.