'56 ഇഞ്ച് നെഞ്ചുള്ള ബോക്‌സര്‍, ആദ്യം ഇടിച്ചിട്ടത് സ്വന്തം കോച്ചായ അഡ്വാനിയെ'; പരിഹാസവുമായി രാഹുല്‍

ന്യൂഡല്‍ഹി: തൊഴിലില്ലായ്മയ്ക്കും അഴിമതിക്കും എതിരേ പോരാടാന്‍ ഇറങ്ങിയ 56 ഇഞ്ചുകാരന്‍ മോദി സ്വന്തം കോച്ചായ അഡ്വാനിയെ തന്നെ ഇടിച്ചിട്ടെന്ന് രാഹുല്‍ ഗാന്ധിയുടെ പരിഹാസം.

'തന്റെ 56 ഇഞ്ച് നെഞ്ചിന്റെ പേര് പറഞ്ഞ് വീമ്പ് കാണിച്ച ബോക്‌സറാണ് മോദി. തൊഴിലില്ലായ്മയേയും കര്‍ഷകരുടെ പ്രശ്‌നങ്ങളേയും അഴിമതിയേയുമെല്ലാം നേരിടാനായി ഇറങ്ങിയതായിരുന്നു' ഹരിയാനയില്‍ തിരഞ്ഞെടുപ്പ് റാലിയില്‍ സംസാരിക്കുകയായിരുന്നു രാഹുല്‍ ഗാന്ധി.

അഡ്വാനിയെ ഇടിച്ചിട്ട ശേഷം മോദി നോട്ട് നിരോധനത്തിലൂടേയും ഗബ്ബര്‍ സിങ് ടാക്‌സിലൂടേയും ചെറുകിട കച്ചവടക്കാരേയും വ്യാപാരികളേയും ഇടിച്ചിട്ടുവെന്നും രാഹുല്‍ പറഞ്ഞു. ഇന്ത്യന്‍ ബോക്‌സിങിന്റെ ഈറ്റില്ലമായി കരുതപ്പെടുന്ന സ്ഥലമാണ് ഹരിയാനയിലെ ഭിവ്‌നി. അവിടെയായിരുന്നു രാഹുലിന്റെ പ്രസംഗം എന്നത് ശ്രദ്ധേയമാണ്.