ആലുവയില്‍ വനിതാ ഡോക്ടറെ ബന്ധിയാക്കി കവര്‍ച്ച

കൊച്ചി: എറണാകുളം ചെങ്ങമനാട് വനിതാ ഡോക്ടറെ ബന്ധിയാക്കി 100 പവന്‍ സ്വര്‍ണവും വജ്രാഭരണങ്ങളും 70,000 രൂപയും കവര്‍ന്നു. ചെങ്ങമ്മനാട് സര്‍ക്കാര്‍ ആശുപത്രിയിലെ മെഡിക്കല്‍ ഓഫിസര്‍ ഡോ. ഗ്രെയ്‌സ് മാത്യൂസിന്റെ വീട്ടില്‍ ഇന്നലെ രാത്രി രണ്ടു മണിയോടെയായിരുന്നു കവര്‍ച്ച. മുഖംമൂടി ധരിച്ചെത്തിയ രണ്ടംഗ സംഘം പുറകിലെ വാതില്‍ കുത്തിത്തുറന്നു അകത്തു കടക്കുകയും മദ്യകുപ്പി കഴുത്തില്‍ വച്ചു ബന്ധിയാക്കി കവര്‍ച്ച നടത്തുകയുമായിരുന്നുവെന്നു ഡോക്ടര്‍ പറഞ്ഞു. താന്‍ അണിഞ്ഞിരുന്ന ആഭരണങ്ങളും മോഷ്ടാക്കള്‍ ഊരിവാങ്ങിയെന്നും ഡോക്ടടര്‍ പറഞ്ഞു. മോഷ്ടാക്കള്‍ പോയ ശേഷം ഡോക്ടര്‍ അയല്‍വാസികളോടു കാര്യം പറയുകയും അവര്‍ പോലിസിനെ അറിയിക്കുകയുമായിരുന്നു. ആലുവ ഡിവൈഎസ്പിയുടെ നേതൃത്വത്തിലുള്ള സംഘം അന്വേഷണം ആരംഭിച്ചു. വീട്ടിലെത്തിയ വിരലടയാള വിദഗ്ധര്‍ തെളിവുകള്‍ ശേഖരിച്ചു.