കെട്ടിടത്തില്‍ നിന്ന് വീണ് യുവാവ് മരിച്ചു

പരപ്പനങ്ങാടി: ചെട്ടിപ്പടി കടലുണ്ടി റോഡില്‍ കെട്ടിടത്തിന്റെ മുകളില്‍ നിന്നും വീണ് യുവാവ് മരിച്ചു. ചെട്ടിപ്പടി ആലുങ്ങല്‍ ബീച്ച് ബാപ്പാലിന്റെ പുരയ്ക്കല്‍ ശിഹാബ് (39) ആണ് മരിച്ചത്. വെള്ളിയാഴ്ച രാത്രി 11 മണിയോടെയാണ് സംഭവം. പോലിസും ട്രോമോ കെയര്‍ വളണ്ടിയര്‍മാരും നാട്ടുകാരും ചേര്‍ന്ന് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

ഡിവിഷന്‍ 41 ലെ കൗണ്‍സിലറുടെ സഹോദരനാണ്. ഭാര്യ: റംലത്ത്. മക്കള്‍: മുഹമ്മദ് ഷംബി, ഇന്‍കിസാന്‍, ഇന്തിലാല്‍, മുഹമ്മദ് ഷാമിഹ്. പിതാവ്: കുഞ്ഞിമോന്‍. മാതാവ്: കുഞ്ഞിമോള്‍. മല്‍സ്യത്തൊഴിലാളിയായ ശിഹാബ് വെള്ളിയാഴ്ച ആയതിനാല്‍ ജോലിക്ക് പോയിരുന്നില്ല. വൈകീട്ടോടെ കൂട്ടുകാര്‍ വിളിച്ചുകൊണ്ടുപോവുകയായിരുന്നുവെന്ന് ബന്ധുക്കള്‍ അറിയിച്ചു. പോലിസ് കേസെടുത്ത് അനേഷണം ആരംഭിച്ചു.