മേഘാലയയില്‍ വീണ്ടും ഖനി അപകടം; രണ്ടു മരണം

ഷില്ലോങ്: കഴിഞ്ഞമാസം സംഭവിച്ച ഖനി അപകടത്തില്‍ രക്ഷാപ്രവര്‍ത്തനം നടക്കുന്നതിനിടെ സമീപപ്രദേശത്തു തന്നെ മറ്റൊരു ഖനിയപകടം. മേഘാലയയിലെ ഈസ്റ്റ് ജയന്തിയ ഹില്‍സ് മേഖലയിലെ ജല്‍യ് ഗ്രാമത്തിലെ മൂക്‌നോറിലാണ് അപകടം. ജില്ലാ ആസ്ഥാനത്തു നിന്ന് അഞ്ചുകിലോമീറ്റര്‍ അകലെയാണ് അപകടം നടന്ന ഖനി. അപകടത്തില്‍ രണ്ടു തൊഴിലാളികള്‍ മരിച്ചു. ഇലാദ് ബരേഹ്, മനോജ് ബസുമതി എന്നിവരുടെ മൃതദേഹങ്ങളാണ് കണ്ടെടുത്തത്. ഇതേ മേഖലയില്‍ കഴിഞ്ഞമാസം 13ന് സംഭവിച്ച ഖനി അപകടത്തിലെ രക്ഷാപ്രവര്‍ത്തനം ഇതുവരെയും ഫലം കണ്ടിട്ടില്ല. അതിനിടെയാണ് കഴിഞ്ഞദിവസം പുതിയ അപകടമുണ്ടായത്. ഇലാദ് ബരേഹയെ വെള്ളിയാഴ്ച മുതല്‍ കാണാനില്ലെന്നു ബന്ധുക്കള്‍ പോലിസില്‍ പരാതിപ്പെട്ടിരുന്നു. തുടര്‍ന്നു പോലിസ് അന്വേഷണമാരംഭിച്ചതോടെയാണ് അപകടം പുറത്തറിഞ്ഞത്.