സംസ്ഥാനത്ത് അപായകരമായ അളവില്‍ അള്‍ട്രാവയലറ്റ് വികിരണം, ജാഗ്രതാ നിര്‍ദേശം

തിരുവനന്തപുരം: സംസ്ഥാനത്ത് കനത്ത ചൂടും അപായകരമായ അളവിലുള്ള അള്‍ട്രാവയലറ്റ് വികിരണവും തുടരുമെന്ന് മുന്നറിയിപ്പ്. ചെങ്ങന്നൂര്‍, കോന്നി, മൂന്നാര്‍ എന്നിവിടങ്ങളില്‍, അള്‍ട്രാവയലറ്റ് ഇന്‍ഡക്‌സ് 8 രേഖപ്പെടുത്തി. ഈ പ്രദേശങ്ങളില്‍ അതീവ ജാഗ്രത വേണമെന്നും ഓറഞ്ച് അലര്‍ട്ട് പ്രഖ്യാപിച്ചതായും ദുരന്ത നിവാരണ അതോറിറ്റി അറിയിച്ചു.

കൊട്ടാരക്കര, ചങ്ങനാശ്ശേരി, ഒല്ലൂര്‍, തൃത്താല, മാനന്തവാടി എന്നിവിടങ്ങളില്‍ അള്‍ട്രാവയലറ്റ് സൂചിക 6-7 രേഖപ്പെടുത്തിയിട്ടുണ്ട്. ഈ മേഖലകളില്‍ മഞ്ഞ അലേര്‍ട്ട് നിലവിലുണ്ട്. തുടര്‍ച്ചയായി കൂടുതല്‍ സമയം അള്‍ട്രാവയലറ്റ് രശ്മികള്‍ ശരീരത്തില്‍ ഏല്‍ക്കുന്നത് സൂര്യാതപത്തിനും ത്വക്ക് രോഗങ്ങള്‍ക്കും നേത്രരോഗങ്ങള്‍ക്കും മറ്റ് ആരോഗ്യ പ്രശ്‌നങ്ങള്‍ക്കും കാരണമായേക്കാം. പൊതുജനങ്ങള്‍ സുരക്ഷാമുന്‍കരുതലുകള്‍ സ്വീകരിക്കണമെന്നും കാലാവസ്ഥ വകുപ്പ് അറിയിച്ചു.