ഇടുക്കിയില്‍ മിനി ബസ് നിയന്ത്രണം വിട്ട് മറിഞ്ഞു; ഡ്രൈവര്‍ അടക്കം 21 പേര്‍ക്ക് പരിക്ക്

ഇടുക്കി: കൊടികുത്തിക്ക് സമീപം വിനോദസഞ്ചാരികളുടെ വാഹനം നിയന്ത്രണം വിട്ട് മറിഞ്ഞു. ദേശീയ പാതയില്‍ പെരുവന്താനം- കൊടികുത്തി- ചാമപ്പാറ വളവില്‍ നടന്ന അപകടത്തില്‍ ഡ്രൈവര്‍ അടക്കം 21 പേര്‍ക്ക് പരിക്കേറ്റു. തേക്കടി സന്ദര്‍ശനത്തിന് ശേഷം തിരികെ തിരുവനന്തപുരത്തേക്ക് പോവുന്നതിനിടെയാണ് അപകടം സംഭവിച്ചത്.

50 അടി താഴ്ചയിലേക്കാണ് വാഹനം പതിച്ചത്. താഴെയുള്ള തെങ്ങില്‍ തട്ടിയാണ് വാഹനം നിന്നിരുന്നത്. പിന്നില്‍ വന്ന വാഹനങ്ങളില്‍ നിന്നുള്ളവരും പോലിസുമാണ് രക്ഷാപ്രവര്‍ത്തനം നടത്തിയത്. സാരമായി പരിക്കേറ്റ എട്ടുപേരെ കാഞ്ഞിരപ്പള്ളി താലൂക്കാശുപത്രിയില്‍ പ്രവേശിപ്പിച്ചു. ബാക്കിയുള്ളവരെ മുണ്ടക്കയത്തെ സ്വകാര്യാശുപത്രിയിലും പ്രവേശിപ്പിച്ചു. മുംബൈ താനെ സ്വദേശികളുടെ വാഹനമാണ് അപകടത്തില്‍പ്പെട്ടത്.