കര്‍ഷക പ്രതിഷേധം: കര്‍ണാടകത്തില്‍ ഇന്ന് ബന്ദ്

ബംഗളുരൂ: സംസ്ഥാന സര്‍ക്കാര്‍ പാസാക്കിയ കര്‍ഷക വിരുദ്ധ നിയമങ്ങളില്‍ പ്രതിഷേധിച്ചു കര്‍ണാടകയില്‍ഇന്ന് ബന്ദ്. രാവിലെ ആറു മുതല്‍ വൈകീട്ട് ആറു വരെയാണ് ബന്ദ്. വിവിധ കര്‍ഷക സംഘടനകളുടെ നേതൃത്വത്തില്‍ സംസ്ഥാന വ്യാപകമായി പ്രതിഷേധിക്കും.

അടുത്തിടെ യെദ്യൂരപ്പ സര്‍ക്കാര്‍ നടപ്പാക്കിയ ഭൂപരിഷ്‌കരണ നിയമ ഭേദഗതി, സര്‍ക്കാര്‍ സംഭരണ കേന്ദ്രങ്ങളുടെ അധികാരം എടുത്തു കളഞ്ഞത് എന്നീ നടപടികള്‍ക്കെതിരെയാണ് പ്രതിഷേധം. ബംഗളുരുവില്‍ കോണ്‍ഗ്രസ് അടക്കമുള്ള വിവിധ രാഷ്ട്രീയ ദലിത് സംഘടകളുടെ പിന്തുണയും സമരക്കാര്‍ക്കുണ്ട്. കൂടാതെ തൊഴിലാളികളും കര്‍ഷകര്‍ക്ക് പിന്തുണയുമായി എത്തുന്നുണ്ട്.

കര്‍ണാടകയിലെ എല്ലാ സംസ്ഥാന ദേശിയ പാതകളും സ്തംഭിപ്പിക്കുമെന്നാണ് കര്‍ഷകരുടെ ഭീഷണി. എന്നാല്‍ ബന്ദ് നടത്താന്‍ അനുമതി നല്‍കിയിട്ടില്ലെന്നും നിയമം ലംഘിച്ചാല്‍ കര്‍ശന നടപടി സ്വീകരിക്കുമെന്നും കര്‍ണാടക പോലീസ് മുന്നറിയിപ്പ് നല്‍കിയിട്ടുണ്ട്.