ദേശീയ കലാഉത്സവ് 2020-21 ഉദ്ഘാടനം

മാള: ബിആര്‍സി മാളയുടെ ആഭിമുഖ്യത്തില്‍ അന്നമനട ബിആര്‍സിയില്‍ ദേശീയ കലാഉത്സവ് 2020-21ന്റെ ഭാഗമായുള്ള കലാപരിപാടികള്‍ അരങ്ങേറി. കൊവിഡ് മഹാമാരിയുടെ പശ്ചാത്തലത്തില്‍ ഏഷ്യയിലെ എറ്റവും വലിയ കലാമേളയായ സംസ്ഥാന സ്‌കൂള്‍ കലോത്സവം മാറ്റിവെച്ച സാഹചര്യത്തിലാണ് ദേശീയ കലാഉത്സവ് 2020-21 ന്റെ ഭാഗമായി കലാമേള സംഘടിപ്പിച്ചത്.

കുട്ടികളിലെ സര്‍ഗ്ഗശേഷികളെ പ്രോത്സാഹിപ്പിക്കുന്നതിനായി ദേശീയ തലത്തില്‍ സംഘടിപ്പിക്കുന്ന കലാ ഉത്സവ് 2020-21ന്റെ പ്രാദേശിക മത്സരങ്ങളാണ് നടന്നത്.മൃദംഗവിദ്വാന്‍ സുജന്‍ പൂപ്പത്തി കലാ ഉത്സവ് ഉദ്ഘാടനം ചെയ്തു. മാള ബ്ലോക്ക് പ്രൊജക്ട് കോര്‍ഡിനേറ്റര്‍ വി വി ശശി മാസ്റ്റര്‍ അധ്യക്ഷത വഹിച്ചു. ബിആര്‍സി കോര്‍ഡിനേറ്റര്‍ സൈന ജോസഫ്, ട്രെയ്‌നര്‍ എം എ സതി സംസാരിച്ചു. വിഷ്വല്‍ ആര്‍ട്‌സ് ദ്വിമാന, ത്രിമാന വിഭാഗങ്ങള്‍, നാടോടി സംഗീതം, ശാസ്ത്രീയ സംഗീതം, ഉപകരണ സംഗീതം, നാടോടി നൃത്തം, ശാസ്ത്രീയ നൃത്തം എന്നീ ഇനങ്ങളിലാണ് പ്രദേശികതല മത്സരങ്ങള്‍ സംഘടിപ്പിച്ചത്. വിജയികളാവുന്നവര്‍ക്ക് ജില്ലാ, സംസ്ഥാന, ദേശീയ തലങ്ങളില്‍ നടക്കുന്ന മത്സരങ്ങള്‍ക്ക് പങ്കെടുക്കാം.