പശ്ചിമ ബംഗാള്‍ തിരഞ്ഞെടുപ്പ്: മൂന്നാം അനുബന്ധ വോട്ടര്‍ പട്ടിക പുറത്തിറക്കി

കൊല്‍ക്കത്ത: പശ്ചിമ ബംഗാള്‍ നിയമസഭാ തിരഞ്ഞെടുപ്പിനെ മുന്നോടിയായി തിരഞ്ഞെടുപ്പ് കമ്മീഷന്‍ മൂന്നാം അനുബന്ധ വോട്ടര്‍ പട്ടിക പുറത്തിറക്കി. പ്രത്യേക തീവ്ര പരിഷ്‌കരണ (എസ്‌ഐആര്‍) പ്രക്രിയയുടെ ഭാഗമായി തയ്യാറാക്കിയ അവസാനഘട്ട പട്ടികയാണിത്.

മാര്‍ച്ച് 23നു പുറത്തിറക്കിയ ആദ്യ പട്ടികയില്‍ പത്തു ലക്ഷം പേരും, മാര്‍ച്ച് 27ലെ രണ്ടാം പട്ടികയില്‍ 21 ലക്ഷം പേരും ഉള്‍പ്പെടുത്തിയിരുന്നു. എന്നാല്‍ മൂന്നാം പട്ടികയിലെ കൃത്യമായ കണക്കുകള്‍ കമ്മീഷന്‍ പുറത്തുവിട്ടിട്ടില്ല. പരിഷ്‌കരണ നടപടികള്‍ ആരംഭിക്കുമ്പോള്‍ 7.66 കോടി ആയിരുന്ന വോട്ടര്‍മാരുടെ എണ്ണം വ്യാപകമായ വെട്ടിമാറ്റലുകള്‍ക്ക് പിന്നാലെ 6.44 കോടിയായി കുറഞ്ഞതായി കണക്കുകള്‍ സൂചിപ്പിക്കുന്നു. ഇതുകൂടാതെ ഏകദേശം 60 ലക്ഷം പേരുടെ വിവരങ്ങള്‍ ഇപ്പോഴും പരിശോധനയിലാണ്.

വോട്ടര്‍ പട്ടികയില്‍ ഉണ്ടായ ക്രമക്കേടുകളും പരാതികളും ഉയര്‍ന്ന സാഹചര്യത്തില്‍, തിരുത്തല്‍ നടപടികള്‍ വേഗത്തിലാക്കാന്‍ സുപ്രിംകോടതി നിര്‍ദേശം നല്‍കിയതോടെയാണ് കമ്മീഷന്‍ നടപടികള്‍ ശക്തമാക്കിയത്. 294 മണ്ഡലങ്ങളിലേക്കുള്ള വോട്ടെടുപ്പ് രണ്ടു ഘട്ടങ്ങളിലായാണ് നടത്തുക. ഏപ്രില്‍ 23ന് 152 മണ്ഡലങ്ങളിലും, ഏപ്രില്‍ 29നു ശേഷിക്കുന്ന 142 മണ്ഡലങ്ങളിലും വോട്ടെടുപ്പ് നടക്കും. വോട്ടെണ്ണല്‍ മെയ് നാലിനാണ് നിശ്ചയിച്ചിരിക്കുന്നത്.