ജാതി അടിസ്ഥാനത്തില്‍ സെന്‍സസ് നടത്തില്ലെന്ന് ആഭ്യന്തര മന്ത്രാലയം

ന്യൂഡല്‍ഹി: 2021 വര്‍ഷത്തില്‍ ജാതി അടിസ്ഥാനത്തില്‍ സെന്‍സസ് നടത്താന്‍ ആലോചനയില്ലെന്ന് ആഭ്യന്ത്ര മന്ത്രാലയം. മറ്റ് ജാതികളുടെ കണക്കെടുക്കില്ലെങ്കിലും പട്ടികജാതി, പട്ടികവര്‍ഗ വിഭാഗങ്ങളുടെ എണ്ണം മുന്‍കാലങ്ങളിലെപ്പോലെ ഇത്തവണയും സെന്‍സസില്‍ ഉല്‍പ്പെടുത്തും.

ജാതി അടിസ്ഥാനത്തില്‍ സെന്‍സസ് നടത്തുന്നത് ഒരു നയപരമായ പ്രശ്‌നമാണെന്ന് ആഭ്യന്തര സഹമന്ത്രി രാജ്യസഭയില്‍ പറഞ്ഞു.

ഇന്ത്യ സര്‍ക്കാര്‍ പട്ടികജാതി, പട്ടിക വര്‍ഗ വിഭാഗങ്ങളുടെ കണക്കല്ലാതെ മറ്റ് ജാതികളുടെ കണക്കെടുക്കാറില്ലെന്ന് രാജ്യസഭയില്‍ എഴുതി നല്‍കിയ മറുപടിയില്‍ മന്ത്രി നിത്യാനന്ദ റായി പറഞ്ഞു.

ആന്ധ്ര നിയമസഭ ജാതി സെന്‍സസ് നടത്തണമെന്നാവശ്യപ്പെട്ട് പ്രമേയം പാസ്സാക്കിയതായി അറിയാമെന്ന് മന്ത്രി പറഞ്ഞു.

നാഷണല്‍ സാംപിള്‍ സര്‍വേ രാജ്യത്തെ സാമൂഹിക വിഭാഗങ്ങളെ കണക്കെടുക്കാന്‍ ഉദ്ദേശിച്ചുള്ളതല്ലെന്ന് മന്ത്രി പറഞ്ഞു. സെന്‍സസ് ജാതി അടിസ്ഥാനത്തിലെ കണക്കെടുക്കാനുള്ള ഉപാധിയല്ലെന്നും മന്ത്രി പറഞ്ഞു.

മന്ത്രിമാരടക്കമുള്ളവരുടെ അഭിപ്രായമനുസരിച്ചാണ് സെന്‍സസ് ഷെഡ്യൂള്‍ തീരുമാനിക്കുന്നതെന്നും മന്ത്രി പറഞ്ഞു.