പറവൂരില്‍ ബിഎല്‍ഒയുടെ ആത്മഹത്യ: ബിജെപിയുടെ രാഷ്ട്രീയ അജണ്ടയുടെ ഇരയെന്ന് എസ്ഡിപിഐ

കൊച്ചി: പറവൂര്‍ മൂത്തക്കുന്നത്ത് ആത്മഹത്യ ചെയ്ത എസ്എന്‍എം ട്രെയിനിംഗ് കോളേജ് ജീവനക്കാരന്‍ ഷിജി ബിജെപിയുടെ രാഷ്ട്രീയ അജണ്ടയുടെ ഇരയാണെന്ന് എസ്ഡിപിഐ ജില്ലാ സെക്രട്ടറി എന്‍ കെ നൗഷാദ് ആരോപിച്ചു. ബിഎല്‍ഒ ജോലിയിലെ അമിത സമ്മര്‍ദ്ദം കാരണം ഷിജിക്ക് ജീവന്‍ നഷ്ടമായത് ഭരണകൂടം സൃഷ്ടിച്ച കൊലപാതകമാണ്.

നിയമസഭാ തിരഞ്ഞെടുപ്പ് ലക്ഷ്യമിട്ട് വോട്ടര്‍ പട്ടികയില്‍ രാഷ്ട്രീയ നേട്ടങ്ങള്‍ ഉണ്ടാക്കാന്‍ ബിജെപി കേന്ദ്ര സര്‍ക്കാര്‍ നടത്തുന്ന അനാവശ്യ തിടുക്കമാണ് ഈ ദുരന്തത്തിന് കാരണം. എസ്‌ഐആര്‍ സംവിധാനത്തിലെ പിഴവുകളും ഫയലുകള്‍ മടങ്ങി വരുന്നതും ഉദ്യോഗസ്ഥരെ മാനസികമായി തകര്‍ക്കുകയാണ്. രാഷ്ട്രീയ അജണ്ടകള്‍ക്കായി ഉദ്യോഗസ്ഥരെ ചാവേറുകളാക്കുന്ന സമീപനം അവസാനിപ്പിക്കണമെന്നും ഷിജിയുടെ മരണത്തില്‍ ഉത്തരവാദികളായ തെരഞ്ഞെടുപ്പ് കമ്മീഷനെതിരെ നരഹത്യക്ക് കേസെടുക്കണമെന്നും അദ്ദേഹം ആവശ്യപ്പെട്ടു.