തിരുവനന്തപുരം: മുസ് ലിം, ക്രിസ്ത്യന്, ബുദ്ധ, സിഖ്, പാര്സി, ജൈന എന്നീ ന്യൂനപക്ഷ മത വിഭാഗങ്ങളില്പ്പെടുന്ന വിധവകള്, വിവാഹബന്ധം വേര്പ്പെട്ടവര്, ഉപേക്ഷിക്കപ്പെട്ടവര് എന്നിവര്ക്ക് വീടുകള് അറ്റകുറ്റപ്പണികള് നടത്തി വാസയോഗ്യമാക്കുന്നതിന് ഇമ്പിച്ച് ബാവ ഭവന പുനരുദ്ധാരണ പദ്ധതിയില് ന്യൂനപക്ഷക്ഷേമ വകുപ്പ് ധനസഹായം നല്കുന്നു. ശരിയായ ജനലുകള്/ വാതിലുകള്/മേല്ക്കൂര/ ഫ്ലോറിങ്/ഫിനിഷിങ്/ പ്ലംബിങ്/ സാനിറ്റേഷന്/ ഇലക്ട്രിഫിക്കേഷന് എന്നിവയില്ലാത്ത വീടുകളുടെ അടിസ്ഥാന സൗകര്യം മെച്ചപ്പെടുത്തുന്നതിനാണ് ധനസഹായം നല്കുന്നത്. 50,000/ രൂപയാണ് ധനസഹായം. ഇത് തിരിച്ചടക്കേണ്ടതില്ല. അപേക്ഷകയുടെ സ്വന്തം / പങ്കാളിയുടെ പേരിലുള്ള വീടിന്റെ പരമാവധി വിസ്തീര്ണ്ണം 1200 സ്ക്വയര് ഫീറ്റില് കവിയരുത്. അപേക്ഷക കുടുംബത്തിലെ ഏക വരുമാനദായകയായിരിക്കണം. ബി.പി.എല് കുടുബത്തിന് മുന്ഗണന.
അപേക്ഷാഫോറം ന്യൂനപക്ഷക്ഷേമവകുപ്പിന്റെ www.minortiywelfare.kerala.gov.in എന്ന വെബ്സൈറ്റില് നിന്നും ലഭിക്കും.
പൂരിപ്പിച്ച അപേക്ഷകള് ബന്ധപ്പെട്ട രേഖകള് സഹിതം കളക്ട്രേറ്റിലെ ന്യൂനപക്ഷക്ഷേമ സെക്ഷനിലേയ്ക്ക്, ഡെപ്യൂട്ടി കളക്ടര് (ജനറല്) ജില്ലാ ന്യൂനപക്ഷ ക്ഷേമ സെക്ഷന് തൃശൂര് എന്ന വിലാസത്തില് ലഭിക്കണം. അപേക്ഷ ലഭിക്കേണ്ട അവസാന തിയതി സെപ്റ്റംബര് 30.