മുന്നണിയിൽ രണ്ടാമൻ സിപിഐ; കേരള കോൺഗ്രസ്​ എം ബന്ധം ​കൊണ്ട്​ ഇടതുമുന്നണിക്ക്​ ദോഷമുണ്ടായില്ല: വി ബി ബിനു

കോട്ടയം: ജില്ലയിൽ ഇടതുമുന്നണിയിലെ രണ്ടാമൻ സിപിഐ തന്നെയെന്ന്​ പുതുതായി തിരഞ്ഞെടുക്കപ്പെട്ട സിപിഐ ജില്ല സെക്രട്ടറി അഡ്വ. വി ബി ബിനു​. കോട്ടയം പ്രസ്​ ക്ലബിൽ മുഖാമുഖം പരിപാടിയിൽ സംസാരിക്കുകയായിരുന്നു അദ്ദേഹം. പ്രവർത്തനത്തിലും അംഗബലത്തിലും രണ്ടാംസ്ഥാനവും രാഷ്ട്രീയരംഗത്ത്​ മൂന്നാംസ്ഥാനവും സിപിഐക്കുണ്ട്​​. കേരള കോൺഗ്രസിന്​ അൽപമെങ്കിലും പ്രവർത്തകരുള്ള ജില്ല എന്ന നിലക്ക്​ കൂടുതൽ പരിഗണന നൽകേണ്ടിവരും. അവർക്ക്​ വേറെ ജില്ല നൽകാനില്ല. അത്​ പാർട്ടിക്ക്​ നല്ല ബോധ്യമുണ്ട്​. ആ ബോധ്യത്തോടെയാണ്​ വിട്ടുവീഴ്ച ചെയ്തതെന്നും വി ബി ബിനു​ പറഞ്ഞു.

കേരള കോൺഗ്രസ്​ എം ബന്ധം ​കൊണ്ട്​ മുന്നണിക്ക്​ ദോഷമുണ്ടായില്ല. ഗുണമേ ഉണ്ടായിട്ടുള്ളൂ. ദോഷം സംഭവിച്ചതായി സമ്മേളനം വിലയിരുത്തിയില്ല. കേരള കോൺഗ്രസ്​ എമ്മുമായി ഇടഞ്ഞുപോവേണ്ട സാഹചര്യം ഇന്നില്ല. മുന്നണിക്കകത്ത്​ നേരത്തേ ഇത്തരത്തിൽ പല ചർച്ചകളും ഉണ്ടായിരു​ന്നെങ്കിലും ഇപ്പോൾ അതിനുള്ള സാഹചര്യമല്ല.

ചില വിട്ടുവീഴ്ചകൾ സിപിഐ ചെയ്തിട്ടുണ്ട്​ എന്നതു ശരിയാണ്​. സിപിഐക്ക്​ ഒരു സീറ്റിൽ​ കൂടി മത്സരിക്കാൻ അർഹതയുണ്ടായിരുന്നു. കാഞ്ഞിരപ്പള്ളി കേരള കോൺ​ഗ്രസിൻറെ സിറ്റിങ്​ സീറ്റായിരുന്നതിനാൽ വിട്ടുകൊടുക്കേണ്ടിവന്നു. മറ്റൊരു സീറ്റ്​ കിട്ടണമെന്ന തങ്ങളുടെ​ ആവശ്യം ന്യായമായിരുന്നു. എന്നാൽ, മുന്നണി ബന്ധത്തിനാണ്​ പ്രാധാന്യം നൽകിയത്​. ചില നഷ്ടങ്ങൾ സംഭവിച്ചാലേ പൊതുരാഷ്ട്രീയത്തിൽ നാടിനുവേണ്ടി കൂട്ടായി മു​ന്നോട്ടുപോവാനാവൂ.

തൻറെ സെക്രട്ടറി സ്ഥാനം സംസ്ഥാന നേതൃത്വത്തിനെതിരായ വിജയമായി കണക്കാക്കേണ്ടതില്ല. സംസ്ഥാന നേതൃത്വം ആരെയും സെക്രട്ടറിയായി തീരുമാനിച്ചിട്ടില്ല. സംസ്ഥാന എക്​സിക്യൂട്ടിവിന്​ നിർദേശിക്കാനേ കഴിയൂ. പാർട്ടിയുടെ ഭരണഘടന പ്രകാരം ജില്ല കമ്മിറ്റിക്കാണ്​​ സെക്രട്ടറിയെ തിരഞ്ഞെടുക്കാൻ അവകാശം. 300 പ്രതിനിധികൾ ചേർന്ന്​​ 51 അംഗ ജില്ല കമ്മിറ്റിയെ തിരഞ്ഞെടുത്തു. ജില്ല കമ്മിറ്റിയാണ്​ സെക്രട്ടറിയെ തിരഞ്ഞെടുക്കുന്നത്​. ജില്ല കമ്മിറ്റിയിൽ സ്വാഭാവികമായും പല പേരുകളും വരാം. കമ്മിറ്റിയിലെ ഭൂരിപക്ഷം അനുസരിച്ചാണ്​ ആരു സെക്രട്ടറിയാവണമെന്നു തീരുമാനിക്കുന്നതെന്നും അദ്ദേഹം പറഞ്ഞു.