സണ്‍ഗ്ലാസ് ധരിച്ചതിന് ഒന്നാം വര്‍ഷ ബിരുദ വിദ്യാര്‍ഥിയെ മര്‍ദ്ദിച്ച സീനിയേഴ്‌സിനെതിരെ കേസ്

നടക്കാവ്: ഹോളിക്രോസ് കോളജില്‍ ഒന്നാംവര്‍ഷം ബിരുദ വിദ്യാര്‍ഥിയെ റാഗിങ്ങിന് ഇരയാക്കിയെന്ന് പരാതി. ഒളവണ്ണ വളപ്പില്‍ താനിക്കുന്നത്ത് വി ടി വിഷ്ണുവിനെയാണ് സണ്‍ഗ്ലാസ് ധരിച്ചതിന്റെ പേരില്‍ സീനിയര്‍ വിദ്യാര്‍ഥികള്‍ മര്‍ദിച്ചത്. വിഷ്ണുവിന്റെ പരാതിയില്‍ മൂന്നാം വര്‍ഷ വിദ്യാര്‍ഥികളായ ഗൗതം, മുഹമ്മദ് സിനാന്‍, കണ്ടാലറിയുന്ന മറ്റു നാലു പേര്‍ എന്നിവര്‍ക്കെതിരെ പൊലിസ് കേസെടുത്തു. ഫെബ്രുവരി 14ന് വൈകിട്ട് ആറുമണിയോടെയായിരുന്നു സംഭവം. വോളിബോള്‍ കോര്‍ട്ടില്‍ വച്ച് മൂന്നാം വര്‍ഷ വിദ്യാര്‍ഥികളായ ആറുപേര്‍ മര്‍ദിച്ചുവെന്നാണ് വിഷ്ണു നല്‍കിയ പരാതിയില്‍ പറയുന്നത്. സംഭവം ശ്രദ്ധയില്‍പ്പെട്ടയുടന്‍ നടപടി സ്വീകരിച്ചെന്നും സിസിടിവി ദൃശ്യങ്ങള്‍ പൊലീസിനു കൈമാറിയെന്നും കോളജ് അധികൃതര്‍ അറിയിച്ചു. ആറ് വിദ്യാര്‍ഥികളെ കോളജില്‍നിന്ന് സസ്‌പെന്‍ഡ് ചെയ്തു.