വീണ്ടും അഭയാര്‍ത്ഥി ക്യാംപിന് നേരെ ഇസ്രായേല്‍ ആക്രമണം;39 പേര്‍ കൊല്ലപ്പെട്ടു

ഗസ: അഭയാര്‍ഥികള്‍ താമസിച്ചിരുന്ന യു.എന്‍ സ്‌കൂളിന് നേരെ ഇസ്രായേല്‍ നടത്തിയ ആക്രമണത്തില്‍ 39 പേര്‍ കൊല്ലപ്പെട്ടു. നിരവധി പേര്‍ക്ക് പരിക്കേറ്റിട്ടുണ്ട്. സെന്‍ട്രല്‍ ഗസയിലെ നുസ്രേത്ത് അഭയാര്‍ഥി ക്യാംപിന് നേരെയാണ് ആക്രമണമുണ്ടായത്. യു.എന്‍ സ്‌കൂളിന് നേരെ ആക്രമണം നടത്തിയ വിവരം ഇസ്രായേല്‍ സ്ഥിരീകരിച്ചിട്ടുണ്ട്.

സെന്‍ട്രല്‍ ഗസയില്‍ ഹമാസിനെതിരെ പുതിയ പോരാട്ടത്തിന് തുടക്കം കുറിക്കുമെന്ന് ഇസ്രായേല്‍ പ്രതിരോധസേന അറിയിച്ചതിന് പിന്നാലെയാണ് യു.എന്‍ സ്‌കൂളിന് നേരെ ആക്രമണമുണ്ടായത്. ഇതിന് മുമ്പും അഭയാര്‍ഥികള്‍ താമസിക്കുന്ന സ്ഥലങ്ങള്‍ക്ക് നേരെ ഇസ്രായേല്‍ ആക്രമണം നടത്തിയിട്ടുണ്ട്.

അഭയാര്‍ഥി കേന്ദ്രങ്ങള്‍ക്ക് നേരെ ഇസ്രായേല്‍ നടത്തിയ ആക്രമണങ്ങളില്‍ ഇതുവരെ 455 പേര്‍ കൊല്ലപ്പെട്ടിട്ടുണ്ട്. ഇതിന് മുമ്പ് ഏപ്രില്‍ 11നും 13നും ഇടയില്‍ മൂന്ന് തവണ ഇസ്രായേല്‍ യു.എന്‍ സ്‌കൂളുകള്‍ക്ക് നേരെ നടത്തിയ ആക്രമണത്തില്‍ ഏഴ് പേര്‍ കൊല്ലപ്പെട്ടിരുന്നു. ഗസയിലെ ഇസ്രായേല്‍ അധിനിവേശത്തിന് മുമ്പ് യു.എന്‍ ഏജന്‍സിയായ യു.എന്‍.ആര്‍.ഡബ്യു.എയുടെ 183 സ്‌കുളുകളാണ് ഗസയിലുണ്ടായിരുന്നത്. ഒക്ടോബറില്‍ യുദ്ധം തുടങ്ങിയതോടെ ഈ സ്‌കൂളുകള്‍ അഭയാര്‍ഥി ക്യാംപുകളാക്കുകയായിരുന്നു.