ലക്ഷ്യങ്ങള്‍ തിരിച്ചറിഞ്ഞ് ആക്രമിക്കാന്‍ റഷ്യ ഇറാനെ സഹായിച്ചതായി ജര്‍മ്മനി

യുഎസ്-ഇസ്രായേല്‍ ആക്രമണ ലക്ഷ്യങ്ങള്‍ കണ്ടെത്താന്‍ റഷ്യ ഇറാനെ സഹായിക്കുന്നതായി ജര്‍മനി. കഴിഞ്ഞ ദിവസം യൂറോപ്യന്‍ യൂനിയനും ഇതേ ആരോപണം ഉന്നയിച്ചിരുന്നു. സ്ട്രൈക്ക് സാധ്യതയുള്ള ലക്ഷ്യങ്ങള്‍ തിരിച്ചറിയാന്‍ ഇറാനെ റഷ്യ സഹായിച്ചതായി ജര്‍മ്മന്‍ വിദേശകാര്യ മന്ത്രി ജോഹാന്‍ വാഡെഫുള്‍ ആരോപിച്ചു. പ്രസിഡന്റ് വ്ളാഡിമിര്‍ പുടിന്‍ യുഎസ്-ഇസ്രായേല്‍ യുദ്ധത്തെ തന്റെ ഉക്രെയ്ന്‍ അധിനിവേശത്തില്‍ നിന്ന് ശ്രദ്ധ തിരിക്കുന്നതിനുള്ള ഒരു മാര്‍ഗമായി ഉപയോഗിക്കാന്‍ ആഗ്രഹിക്കുന്നുവെന്നും അദ്ദേഹം ആരോപിച്ചു.

ഫ്രാന്‍സില്‍ നടന്ന ജി 7 യോഗത്തില്‍ മാധ്യമപ്രവര്‍ത്തകരോട് സംസാരിച്ച വാഡെഫുള്‍, യുദ്ധം അവസാനിച്ചതിനുശേഷം ഹോര്‍മുസ് കടലിടുക്കില്‍ സഹായിക്കാന്‍ തയ്യാറാണെന്ന ജര്‍മ്മനിയുടെ നിലപാട് വിശദീകരിക്കാന്‍ യുഎസ് സ്റ്റേറ്റ് സെക്രട്ടറി മാര്‍സിയോ റൂബിയോയുമായി സംസാരിച്ചതായും പറഞ്ഞു.

'മധ്യേഷ്യയിലെ സംഘര്‍ഷം ഉക്രെയ്നിലെ തന്റെ കുറ്റകൃത്യങ്ങളില്‍ നിന്ന് നമ്മുടെ ശ്രദ്ധ തിരിക്കുമെന്ന് പുടിന്‍ കപടമായി പ്രതീക്ഷിക്കുന്നു,'' വാഡെഫുള്‍ പറഞ്ഞു. ''ഈ കണക്കുകൂട്ടല്‍ വിജയിക്കരുത്. രണ്ട് സംഘര്‍ഷങ്ങളും എത്രത്തോളം പരസ്പരം ബന്ധപ്പെട്ടിരിക്കുന്നുവെന്ന് നമുക്ക് വളരെ വ്യക്തമായി കാണാന്‍ കഴിയും. സാധ്യതയുള്ള ലക്ഷ്യങ്ങളെക്കുറിച്ചുള്ള വിവരങ്ങള്‍ നല്‍കി റഷ്യ ഇറാനെ പിന്തുണയ്ക്കുന്നുണ്ട്.' ജര്‍മ്മന്‍ വിദേശകാര്യ മന്ത്രി പറഞ്ഞു.