നിപ്പ വൈറസ് ബാധിച്ച് മരിച്ച കുട്ടിക്ക് ചികിത്സാ നിഷേധം: അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷന്‍

കോഴിക്കോട്: നിപ്പ വൈറസ് ബാധിച്ച് മരിച്ച കുട്ടിക്ക് കോഴിക്കോട് മെഡിക്കല്‍ കോളജ് ആശുപത്രിയില്‍ യഥാസമയം ചികിത്സ കിട്ടിയില്ലെന്ന പരാതിയില്‍ സത്യസന്ധവും സുതാര്യവുമായ അന്വേഷണം നടത്തി 15 ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് സംസ്ഥാന മനുഷ്യാവകാശ കമ്മീഷന്‍.

കോഴിക്കോട് ജില്ലാ മെഡിക്കല്‍ ഓഫിസര്‍ക്കും ദുരന്തനിവാരണ അതോറിറ്റി ചെയര്‍മാനായ കോഴിക്കോട് ജില്ലാ കലക്ടര്‍ക്കുമാണ് കമ്മീഷന്‍ ജുഡീഷ്യല്‍ അംഗം കെ ബൈജൂനാഥ് ഉത്തരവ് നല്‍കിയത്.

കുട്ടിക്ക് മെഡിക്കല്‍ കോളജ് ആശുപത്രിയില്‍ നിന്നും യഥാസമയം ചികിത്സ കിട്ടിയില്ലെന്നാരോപിച്ച് പൊതുപ്രവര്‍ത്തകനായ നൗഷാദ് തെക്കയില്‍ സമര്‍പ്പിച്ച പരാതിയിലാണ് നടപടി.

ഈ ആവശ്യം ഉന്നയിച്ച് ഇന്നലെ എസ്ഡിപിഐ കോഴിക്കോട് ജില്ലാ കമ്മിറ്റി മെഡിക്കല്‍ കോളജ് സൂപ്രണ്ടിന്റെ ഓഫിസിലേക്ക് മാര്‍ച്ച് നടത്തിയിരുന്നു.