മുസ്ലിംലീഗ് വൈറസ് ബാധയാണെന്ന് യോഗി ആദിത്യനാഥ്
മുസ്ലിംലീഗ് ഒരു വൈറസാണ്. ഈ വൈറസിനാല് ഒരിക്കല് നമ്മുടെ രാജ്യം വിഭജിക്കപ്പെട്ടതാണ്. ഇപ്പോള് കോണ്ഗ്രസിന് ഈ വൈറസ് ഏറ്റിട്ടുണ്ട്. അതിനാല് എല്ലാവരും സൂക്ഷിക്കണം. ലോക്സഭാ തിരഞ്ഞെടുപ്പില് കോണ്ഗ്രസ് ജയിച്ചാല് ഈ വൈറസ് രാജ്യമാകെ പടരുമെന്നും യോഗി പറഞ്ഞു.
ബുലന്ദ്ഷഹര്: രാഹുല് ഗാന്ധിയുടെ വയനാട് സ്ഥാനാര്ത്ഥിത്വത്തിനെതിരേ വര്ഗീയ പ്രചാരണവുമായി ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്. കോണ്ഗ്രസിന്റെ മുസ്ലിംലീഗുമായുള്ള ബന്ധത്തെയാണ് യോഗി വര്ഗീയ ആയുധമാക്കുന്നത്.
മുസ്ലിംലീഗ് ഒരു വൈറസാണ്. ഈ വൈറസിനാല് ഒരിക്കല് നമ്മുടെ രാജ്യം വിഭജിക്കപ്പെട്ടതാണ്. ഇപ്പോള് കോണ്ഗ്രസിന് ഈ വൈറസ് ഏറ്റിട്ടുണ്ട്. അതിനാല് എല്ലാവരും സൂക്ഷിക്കണം. ലോക്സഭാ തിരഞ്ഞെടുപ്പില് കോണ്ഗ്രസ് ജയിച്ചാല് ഈ വൈറസ് രാജ്യമാകെ പടരുമെന്നും യോഗി പറഞ്ഞു.
ഉത്തര്പ്രദേശിലെ ബുലന്ദ്ഷഹറില് തിരഞ്ഞെടുപ്പ് പ്രചാരണ പരിപാടിയില് പങ്കെടുത്ത് സംസാരിക്കുമ്പോള് ആണ് അദ്ദേഹം ഇക്കാര്യം പറഞ്ഞത്. അമേഠിയില് പരാജയം ഉറപ്പായത് കൊണ്ടാണ് രാഹുല് ഗാന്ധി കേരളത്തിലേക്ക് ഒളിച്ചോടിയതെന്നും അവിടെ മുസ്ലിംലീഗാണ് രാഹുലിന് പിന്തുണ നല്കുന്നതെന്നും യോഗി ആരോപിച്ചു.
രാജ്യദ്രോഹ കുറ്റവും അഫ്സ്പയും എടുത്തുകളയുമെന്ന കോണ്ഗ്രസ്സിന്റെ വാഗ്ദാനത്തേയും യോഗി വിമര്ശിച്ചു. രാജ്യത്ത് അക്രമവും ഭീകരവാദവും വളര്ത്താനാണ് കോണ്ഗ്രസ്സ് ശ്രമിക്കുന്നതെന്നും യോഗി കുറ്റപ്പെടുത്തി. വയനാട് സീറ്റില് മത്സരിക്കാന് രാഹുല് ഗാന്ധി തീരുമാനിച്ചത് മുതല് ഈ വിഷയം ഉത്തരേന്ത്യയില് ബിജെപി പ്രചാരണവിഷയമായി ഉപയോഗിക്കുന്നുണ്ട്. ന്യൂനപക്ഷങ്ങള് ഭൂരിപക്ഷമായ മണ്ഡലത്തിലാണ് രാഹുല് ഗാന്ധി മത്സരിക്കുന്നതെന്നും ഹിന്ദുക്കളില് നിന്നും രാഹുല് ഒളിച്ചോടുകയാണെന്നും നേരത്തെ പ്രധാനമന്ത്രി നരേന്ദ്രമോദി പറഞ്ഞിരുന്നു.
