പയ്യന്നൂരില്‍ സിപിഎം വ്യാജ ആധാര്‍ കാര്‍ഡ് നിര്‍മിക്കുന്നതായി കെ സി വേണുഗോപാല്‍

കണ്ണൂര്‍: സിപിഎമ്മിനെതിരേ ഗുരുതര ആരോപണവുമായി കെ സി വേണുഗോപാല്‍. പയ്യന്നൂരില്‍ സിപിഎം വ്യാജ ആധാര്‍ കാര്‍ഡ് നിര്‍മിക്കുന്നുവെന്നാണ് ആരോപണം. പയ്യന്നൂര്‍ ഏരിയ കമ്മിറ്റി ഓഫീസിലാണ് വ്യാജ ഐ ഡി നിര്‍മ്മാണം നടക്കുന്നത്. പരാജയഭീതിയില്‍ സിപിഎം പഴയ തന്ത്രങ്ങള്‍ പുറത്തെടുക്കുന്നുവെന്നും വിറളി പൂണ്ടിരിക്കുകയാണെന്നും കെ സി വേണുഗോപാല്‍ മാധ്യമങ്ങളോട് പറഞ്ഞു.

വയനാട് ഫണ്ട് വിഷയത്തിലെ ചോദ്യങ്ങളില്‍ നിന്ന് ഒഴിഞ്ഞുമാറിയ കെ സി വേണുഗോപാല്‍ കണക്ക് കൃത്യമായുണ്ട്, പുറത്തുവിടുമെന്ന് പറഞ്ഞു. ജി സുധാകരനെ വര്‍ഗീയവാദിയായി ചിത്രീകരിക്കാനാണ് മുഖ്യമന്ത്രി പിണറായി വിജയന്റെ ശ്രമമെന്നും ലോ ലെവല്‍ അറ്റാക്കുമായാണ് മുഖ്യമന്ത്രി മുന്നോട്ട് പോകുന്നതെന്നും അദ്ദേഹം പറഞ്ഞു. മുഖ്യമന്ത്രി ആര്‍ക്കുവേണ്ടിയാണ് പ്രസംഗം നടത്തുന്നത് എല്ലാവര്‍ക്കും അറിയാം. ജി സുധാകരനെ പറയുന്ന മുഖ്യമന്ത്രി സ്വന്തം മുഖം കണ്ണാടിയില്‍ നോക്കുന്നത് നന്നായിരിക്കുമെന്നും കെ സി വേണുഗോപാല്‍ പരിഹസിച്ചു.