ഐഎസ്എല്‍; കേരളാ ബ്ലാസ്‌റ്റേഴ്‌സിനെ അട്ടിമറിച്ച് ഈസ്റ്റ് ബംഗാള്‍

കൊല്‍ക്കത്ത: ഇന്ത്യന്‍ സൂപ്പര്‍ ലീഗില്‍ കേരളാ ബ്ലാസ്റ്റേഴ്‌സിന് ഞെട്ടിക്കുന്ന തോല്‍വി.ലീഗിലെ ഒമ്പതാം സ്ഥാനക്കാരായ ഈസ്റ്റ് ബംഗാളിനോട് എതിരില്ലാത്ത ഒരു ഗോളിനാണ് മഞ്ഞപ്പട തോല്‍വി വഴങ്ങിയത്.നിരവധി മികച്ച അവസരങ്ങളാണ് ബ്ലാസ്‌റ്റേഴ്‌സ് താരങ്ങള്‍ നഷ്ടപ്പെടുത്തിയത്. പിഴവ് വരുത്തുന്നതില്‍ താരങ്ങള്‍ മല്‍സരിക്കുകയായിരുന്നു. ഈസ്റ്റ് ബംഗാളിനെ ചെറുതായി കണ്ട് ആത്മവിശ്വാസത്തോടെ ഇറങ്ങിയത് കൊമ്പന്‍മാര്‍ക്ക് തിരിച്ചടിയാവുകയായിരുന്നു. 77ാം മിനിറ്റില്‍ ക്ലെയിറ്റണ്‍ സില്‍വയാണ് ഈസ്റ്റ് ബംഗാളിന്റെ വിജയഗോള്‍ നേടിയത്. തോറ്റെങ്കിലും ബ്ലാസ്‌റ്റേഴ്‌സ് മൂന്നാം സ്ഥാനത്ത് തന്നെ തുടരുകയാണ്. ജയത്തോടെ ഈസ്റ്റ് ബംഗാള്‍ പ്ലേ ഓഫ് പ്രതീക്ഷയ്ക്ക് ജീവനേകി.