മാഞ്ചസ്റ്ററില്‍ താന്‍ വഞ്ചിക്കപ്പെട്ടു: യുനൈറ്റഡിനെതിരേ റൊണാള്‍ഡോ

മാഞ്ചസ്റ്റര്‍: മാഞ്ചസ്റ്റര്‍ യുനൈറ്റഡില്‍ താന്‍ വഞ്ചിക്കപ്പെട്ടുവെന്ന് പോര്‍ച്ചുഗല്‍ സൂപ്പര്‍ താരം ക്രിസ്റ്റ്യനോ റൊണാള്‍ഡോ.തന്നെ ക്ലബ്ബില്‍ നിന്ന് പുറത്താക്കാനാണ് കോച്ച് എറിക് ടെന്‍ ഹാഗും ചില കളിക്കാരും ശ്രമിക്കുന്നതെന്നും താരം ഒരഭിമുഖത്തില്‍ വ്യക്തമാക്കി. കോച്ച് തനിക്ക് ബഹുമാനം നല്‍കുന്നില്ല. അതിനാല്‍ കോച്ചിനോടും തനിക്ക് ബഹുമാനമില്ല. ക്ലബ്ബില്‍ താന്‍ വഞ്ചിക്കപ്പെട്ടു. യുനൈറ്റഡ് എല്ലാ നിലയിലും തകരുകയാണെന്നും താരം വ്യക്തമാക്കി. പഴയ ക്ലബ്ബില്‍ റെക്കോഡ് നേട്ടങ്ങള്‍ ഉണ്ടാക്കിയ റൊണാള്‍ഡോ രണ്ടാം വരവിലെ ആദ്യ സീസണില്‍ തിളങ്ങിയിരുന്നു. എന്നാല്‍ നിലവിലെ സീസണില്‍ പലപ്പോഴും ടീമിന്റെ ആദ്യ സ്‌ക്വാഡില്‍ പോലും റോണോ ഇടം നേടിയിരുന്നില്ല. ക്ലബ്ബിനെതിരേ രംഗത്ത് വന്നതോടെ ഇതിഹാസ താരത്തിന്റെ യുനൈറ്റഡിലെ ഭാവി അനിശ്ചിതത്വത്തിലാവുമെന്നാണ് റിപ്പോര്‍ട്ട്.