സ്പാനിഷ് ലീഗില്‍ ബാഴ്‌സയെ സമനിലയില്‍ പിടിച്ച് സെവിയ്യ; റയലിന് ജയം

ക്യാപ് നൗ: സ്പാനിഷ് ലീഗിലെ ബാഴ്‌സയുടെ തുടര്‍ ജയങ്ങള്‍ക്ക് വിരാമം. ഇന്ന് സെവിയ്യയാണ് കറ്റാലന്‍സിനെ 1-1 സമനിലയില്‍ കുരുക്കിയത്. എട്ടാം മിനിറ്റില്‍ ഡിജോങിലൂടെ സെവിയ്യ ലീഡെടുത്തു. എന്നാല്‍ രണ്ട് മിനിറ്റുകള്‍ക്ക് ശേഷം കുട്ടീഞ്ഞോ സമനില ഗോള്‍ പിടിച്ചു. പിന്നീട് നിരവധി അവസരങ്ങള്‍ ബാഴ്‌സ നടത്തിയെങ്കിലും സെവിയ്യക്കെതിരേ ഗോള്‍ നേടാന്‍ ബാഴ്‌സയ്ക്കായില്ല. ലീഗില്‍ ഇരു ടീമുകള്‍ക്കും ഏഴ് പോയിന്റാണുള്ളത്.

ലെവന്റെയേ നേരിട്ട റയല്‍ മാഡ്രിഡ് എതിരില്ലാത്ത രണ്ട് ഗോളിന് ജയിച്ചു. ലീഗിലെ തുടര്‍ച്ചയായ അവരുടെ മൂന്നാം ജയമാണിത്. ബ്രസീലിയന്‍ താരങ്ങളായ റൊഡ്രിഗസും വിനീഷ്യസ് ജൂനിയറുമാണ് റയലിനായി സ്‌കോര്‍ ചെയ്തത്. മറ്റൊരു മല്‍സരത്തില്‍ വിയ്യാറയലിനെ നേരിട്ട അത്‌ലറ്റിക്കോ മാഡ്രിഡ് ഇന്ന് ഗോള്‍ രഹിത സമനില വഴങ്ങി.