ഐപിഎല്‍; ഡല്‍ഹിയെ വീഴ്ത്തി ഒതുക്കി ഗുജറാത്ത് ടൈറ്റന്‍സ് ഒന്നില്‍

അഹമ്മദാബാദ്: ഐപിഎല്ലില്‍ ഡല്‍ഹി ക്യാപിറ്റല്‍സിനെതിരായ മത്സരത്തില്‍ ഗുജറാത്ത് ടൈറ്റന്‍സിന് ഏഴ് വിക്കറ്റ് ജയം. അഹമ്മദാബാദ്, നരേന്ദ്ര മോഡി സ്റ്റേഡിയത്തില്‍ ഡല്‍ഹി ഉയര്‍ത്തിയ 204 റണ്‍സ് വിജയലക്ഷ്യം 19.2 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ മറികടക്കുകയായിരുന്നു ഗുജറാത്ത്. 54 പന്തില്‍ 97 റണ്‍സുമായി പുറത്താവാതെ നിന്ന ജോസ് ബട്ലറാണ് ഗുജറാത്തിനെ വിജയത്തിലേക്ക് നയിച്ചത്. ഷെഫാനെ റുതര്‍ഫോര്‍ഡ് (34 പന്തില്‍ 43) മികച്ച പ്രകടനം പുറത്തെടുത്തു.

ക്യാപ്റ്റന്‍ ശുഭ്മാന്‍ ഗില്ലിന്റെ (7) വിക്കറ്റാണ് ഗുജറാത്തിന് ആദ്യം നഷ്ടമായത്. കരുണ്‍ നായരുടെ നേരിട്ടുള്ള ഏറില്‍ റണ്ണൗട്ടാവുകയായിരുന്നു ഗില്‍. പിന്നാലെ സായ് സുദര്‍ശന്‍ (21 പന്തില്‍ 36) ബട്ലര്‍ സഖ്യം 60 റണ്‍സ് കൂട്ടിചേര്‍ത്തു. എട്ടാം ഓവറില്‍ സായ് മടങ്ങിയെങ്കിലും റുതര്‍ഫോര്‍ഡിനെ കൂട്ടുപിടിച്ച് ബട്ലര്‍ ഗുജറാത്തിനെ മുന്നോട്ടുകൊണ്ടുപോയി. വിജയത്തിനരികെ, 19-ാം ഓവറില്‍ റുതര്‍ഫോര്‍ഡ് വീണു. അവസാന ഓവറില്‍ 10 റണ്‍സാണ് ഗുജറാത്തിന് ജയിക്കാന്‍ വേണ്ടിയിരുന്നത്. മിച്ചല്‍ സ്റ്റാര്‍ക്കിന്റെ ആദ്യ പന്തില്‍ സിക്സും രണ്ടാം പന്തില്‍ ഫോറും നേടി രാഹുല്‍ തെവാട്ടിയ (3 പന്തില്‍ 11) ഗുജറാത്തിനെ വിജയത്തിലേക്ക് നയിച്ചു. 54 പന്തുകള്‍ നേരിട്ട ബട്ലര്‍ നാല് സിക്സും 11 ഫോറും നേടി.

ടോസ് നേടി ഗുജറാത്ത് ബൗളിങ് തിരഞ്ഞെടുക്കുകയായിരുന്നു. മുന്‍നിര ബാറ്റ്സ്മാന്‍മാരെല്ലാം മികച്ച പ്രകടനം പുറത്തെടുത്തതോടെയാണ് ഡല്‍ഹി മികച്ച സ്‌കോറിലെത്തിയത്. ആദ്യം ബാറ്റ് ചെയ്ത ഡല്‍ഹി 8 വിക്കറ്റ് നഷ്ടത്തില്‍ 203 റണ്‍സെടുത്തു. കരുണ്‍ നായര്‍, കെഎല്‍ രാഹുല്‍, ട്രിസ്റ്റന്‍ സ്റ്റബ്സ്, ക്യാപ്റ്റന്‍ അക്ഷര്‍ പട്ടേല്‍, അശുതോഷ് ശര്‍മ എന്നിവര്‍ മികച്ച ബാറ്റിങ് പുറത്തെടുത്തു.

32 പന്തില്‍ 39 റണ്‍സെടുത്ത അക്ഷര്‍ ടോപ് സ്‌കോററായി. 19 പന്തില്‍ മൂന്ന് സിക്സും രണ്ട് ഫോറും സഹിതം 37 റണ്‍സെടുത്ത അശുതോഷ് ശര്‍മയുടെ അതിവേഗ ബാറ്റിങ് ടീം സ്‌കോര്‍ 200നു അരികിലെത്തിച്ചു. അവസാന ഓവറിലെ അവസാന പന്ത് ഫോറടിച്ച് കുല്‍ദീപ് യാദവ് സ്‌കോര്‍ 200 കടത്തി.

മലയാളി താരം കരുണ്‍ നായര്‍ 18 പന്തില്‍ രണ്ട് വീതം സിക്സും ഫോറും സഹിതം 31 റണ്‍സ് കണ്ടെത്തി. കെ എല്‍ രാഹുല്‍ 14 പന്തില്‍ നാല് ഫോറും ഒരു സിക്സും സഹിതം 28 റണ്‍സടിച്ചു. ട്രിസ്റ്റന്‍ സ്റ്റബ്സ് 21 പന്തില്‍ 2 ഫോറും ഒരു സിക്സും സഹിതം 31 റണ്‍സ് കണ്ടെത്തി.

അഭിഷേക് പൊരേലിനൊപ്പം കരുണ്‍ നായരാണ് ഡല്‍ഹിക്കായി ഓപ്പണ്‍ ചെയ്തത്. പൊരേല്‍ 9 പന്തില്‍ മൂന്ന് ഫോറും ഒരു സിക്സും സഹിതം 18 റണ്‍സെടുത്തു പുറത്തായി. ഗുജറാത്ത് നിരയില്‍ പ്രസിദ്ധ് കൃഷ്ണ ബൗളിങില്‍ തിളങ്ങി. താരം 4 വിക്കറ്റുകള്‍ വീഴ്ത്തി. ഇഷാന്ത് ശര്‍മ, മുഹമ്മദ് സിറാജ്, അര്‍ഷാദ് ഖാന്‍, സായ് കിഷോര്‍ എന്നിവര്‍ ഓരോ വിക്കറ്റെടുത്തു.