ഐപിഎല്‍ ചെറിയ ലക്ഷ്യം; വലിയ ലക്ഷ്യം ലോകകപ്പ്; ദിനേശ് കാര്‍ത്തിക്ക്

മുംബൈ: റോയല്‍ ചാലഞ്ചേഴ്‌സ് ബാംഗ്ലൂരിനായി തകര്‍പ്പന്‍ ഫോമില്‍ കളിക്കുന്ന ദിനേശ് കാര്‍ത്തിക്ക് തന്റെ ഇന്ത്യന്‍ ടീമിലേക്ക് തിരിച്ചുവരാനുള്ള ആഗ്രഹം വെളിപ്പെടുത്തി. വിരാട് കോഹ്‌ലിയുമായുള്ള സംഭാഷണത്തിനിടെയാണ് താരം ഇന്ത്യയുടെ ലോകകപ്പ് ടീമിലേക്ക് ഇടം നേടാനുള്ള ആഗ്രഹം വ്യക്തമാക്കിയത്. നിലവില്‍ ആര്‍സിബിയ്ക്കായി 197 റണ്‍സാണ് താരം ഈ സീസണില്‍ നേടിയത്. ഫിനിഷറുടെ റോളിലാണ് താരം തിളങ്ങുന്നത്. ആര്‍സിബിയുടെ ഈ സീസണിലെ നാല് ജയങ്ങളിലും ദിനേശ് കാര്‍ത്തിക്കിന്റെ സംഭവാനയുണ്ട്. ആര്‍സിബിയ്ക്കായി ആദ്യ കിരീടമെന്നതാണ് തന്റെ ചെറിയ ലക്ഷ്യം. ഇന്ത്യയുടെ ട്വന്റി-20 ലോകകപ്പ് ടീമില്‍ ഇടം നേടി രാജ്യത്തിനായി കിരീടം നേടുക എന്നതാണ് തന്റെ വലിയ ലക്ഷ്യമെന്നും കാര്‍ത്തിക്ക് പറഞ്ഞു.