സൗദിയിലെ റസ്റ്റോറന്റില്‍ വന്‍ തീപ്പിടിത്തം; കെട്ടിടം പൂര്‍ണമായി കത്തിനശിച്ചു

റിയാദ്: സൗദി അറേബ്യയില്‍ റിയാദിലെ റസ്‌റ്റോറന്റില്‍ വന്‍ തീപ്പിടിത്തം. ദക്ഷിണ റിയാദില്‍ പ്രവര്‍ത്തിക്കുന്ന പ്രമുഖ റസ്റ്റോറന്റ് ശൃംഖലയുടെ അല്‍ ഹസം ഡിസ്ട്രിക്ടില്‍ പ്രവര്‍ത്തിച്ചിരുന്ന ശാഖയിലാണ് തീപ്പിടിത്തമുണ്ടായത്. തീപ്പിടിത്തത്തില്‍ ആര്‍ക്കും അപകടമൊന്നും സംഭവിച്ചിട്ടില്ലെന്നാണ് പ്രാഥമിക വിവരം. രണ്ടുനിലകളിലായാണ് റസ്റ്റോറന്റ് പ്രവര്‍ത്തിച്ചിരുന്നത്.

സിവില്‍ ഡിഫന്‍സ് അധികൃതര്‍ സ്ഥലത്തെത്തി തീയണച്ചു. അപകടമുണ്ടാവാനുള്ള കാരണം വ്യക്തമായിട്ടില്ല. റസ്റ്റോറന്റ് പൂര്‍ണമായി കത്തിനശിച്ച നിലയിലാണ്. തീ പടര്‍ന്നതിന്റെ ദൃശ്യങ്ങള്‍ അടങ്ങിയ വീഡിയോ ക്ലിപ്പിങ്ങുകള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.