അറേബ്യന്‍ വൈബ്‌സില്‍ ഫ്രാങ്കോയും മന്‍സൂര്‍ ഇബ്രാഹീമും മുഖ്യാതിഥികള്‍

ജിദ്ദ: ജിദ്ദ എറണാകുളം സോഷ്യല്‍ ആന്റ് ആര്‍ട്‌സ് കണ്‍സേന്‍ (ജെസാക്ക്) സംഘടിപ്പിക്കുന്ന അറേബ്യന്‍ വൈബ്‌സ് നാളെ ജിദ്ദയില്‍ നടക്കും. ജിദ്ദ കിലോ പത്ത് അല്‍ഹദീഖ ഓഡിറ്റോറിയത്തില്‍ രാത്രി 9 മണിക്ക് തുടങ്ങുന്ന പരിപാടിയില്‍ പ്രമുഖ പിന്നണി ഗായകരായ ഫ്രാങ്കോയും മന്‍സൂര്‍ ഇബ്രാഹീമും മുഖ്യാതിഥികളായിരിക്കും. ദമാമില്‍നിന്നുള്ള ജനപ്രിയ കലാകാരി സൗജന്യ ശ്രീകുമാറിന്റെ സാന്നിധ്യം പരിപാടിയുടെ മാറ്റുകൂട്ടും. ജിദ്ദയിലുള്ള എറണാകുളം ജില്ലക്കാരായ കലാകാരന്‍മാര്‍ക്ക് പരിപാടിയില്‍ അവസരം നല്‍കും. എറണാകുളം ജില്ലയിലെ വിവിധ സാമൂഹിക, സാംസ്‌കാരിക കൂട്ടായ്മകളുടെ കോ-ഓഡിനേഷന്‍ കമ്മിറ്റിയാണ് ജെസാക്ക്.

200 ലധികം ആല്‍ബങ്ങള്‍ നിര്‍മിക്കുകയും നിരവധി ചലച്ചിത്രങ്ങള്‍ക്ക് വേണ്ടി പാടുകയും ചെയ്ത ഫ്രാങ്കോയുടെ മൂന്നാമത്തെ സൗദി സന്ദര്‍ശനമാണിത്. സൗദി കലാ ആസ്വാദകര്‍ക്ക് നല്‍കിയ സൗകര്യങ്ങള്‍ തന്നെ ഏറെ സന്തോഷിപ്പിക്കുന്നുവെന്ന് അദ്ദേഹം പറഞ്ഞു. നിലവിലെ ഇന്ത്യന്‍ സാഹചര്യങ്ങളില്‍ ഒരു കലാകാരനെന്ന നിലയില്‍ എനിക്ക് ദുഖമുണ്ട്. ജനാധിപത്യവിശ്വാസികള്‍ക്ക് ഇത് ഉള്‍ക്കൊള്ളാന്‍ കഴിയില്ലെന്നും അദ്ദേഹം പറഞ്ഞു. അറേബ്യന്‍ വൈബ്‌സിനെക്കുറിച്ച് അറിയിക്കാന്‍ വിളിച്ചുചേര്‍ത്ത വാര്‍ത്താസമ്മേളനത്തില്‍ സഹീര്‍ മാന്‍ഞ്ചാലി, മുഹമ്മദ് ഷാ ആലുവ, ഷിനു ജമാല്‍ എന്നിവരും പങ്കെടുത്തു.