സ്വര്‍ണവില ഉയരുന്നതില്‍ ആശങ്ക വേണ്ടെന്ന് ധനമന്ത്രി നിര്‍മല സീതാരാമന്‍

ന്യൂഡല്‍ഹി: സ്വര്‍ണ വിലയിലെ വര്‍ധനവ് സര്‍ക്കാര്‍ സൂക്ഷ്മമായി നിരീക്ഷിക്കുന്നുണ്ടെന്ന് കേന്ദ്ര ധനമന്ത്രി നിര്‍മല സീതാരാമന്‍. ഇന്ത്യന്‍ വിപണിയിലെ സ്വര്‍ണത്തിന്റേയും വെള്ളിയുടേയും വില നിരീക്ഷിച്ച് വരികയാണെന്നും സാഹചര്യങ്ങള്‍ നിലവില്‍ ആശങ്കാജനകമല്ലെന്നും നിര്‍മല സീതാരാമന്‍ പറഞ്ഞു. നിലവിലെ സ്വര്‍ണത്തിന്റേയും വെള്ളിയുടേയും വിലക്കയറ്റം സീസണ്‍ ആയതിനാലാണെന്നും ധനമന്ത്രി വ്യക്തമാക്കി. റിസര്‍വ് ബാങ്കിന്റെ സെന്‍ട്രല്‍ ബോര്‍ഡ് ഓഫ് ഡയറക്ടര്‍മാരുമായുള്ള പതിവ് ബജറ്റ് യോഗത്തിന് ശേഷമായിരുന്നു മന്ത്രിയുടെ പ്രതികരണം. സെന്‍ട്രല്‍ ബാങ്കുകള്‍ സ്വര്‍ണം വാങ്ങിക്കൂട്ടുകയാണെന്നും അതാണ് വില വര്‍ധനവിന് കാരണമെന്നും നിര്‍മല സീതാരാമന്‍ പറഞ്ഞു.

ഇന്ന് മിക്ക രാജ്യങ്ങളും, പ്രത്യേകിച്ച് അവരുടെ സെന്‍ട്രല്‍ ബാങ്കുകള്‍, സ്വര്‍ണവും വെള്ളിയും വാങ്ങി സൂക്ഷിക്കുന്നു. ഇപ്പോള്‍ ഈ കുതിച്ചുചാട്ടത്തിന് കാരണം കേന്ദ്ര ബാങ്കുകളും വാങ്ങുകയും സംഭരിക്കുകയും ചെയ്യുന്നതാണ്. സ്വര്‍ണം എപ്പോഴും കുടുംബങ്ങള്‍ക്ക് പ്രിയപ്പെട്ട നിക്ഷേപമാണ്. ഉല്‍സവ സീസണില്‍ ആഭ്യന്തര ഉപഭോഗത്തിനായുള്ള ഉയര്‍ന്ന ഡിമാന്‍ഡ് സീസണല്‍ കുതിച്ചുചാട്ടവും കാണുന്നു. ഞങ്ങള്‍ അത് നിരീക്ഷിച്ചുകൊണ്ടിരിക്കുകയാണെന്ന് ധനമന്ത്രി പറഞ്ഞു.

ഡിമാന്‍ഡ് അത്ര ഭയാനകമായ അനുപാതത്തില്‍ എത്തിയിട്ടുണ്ടോ എന്ന് തനിക്ക് ഉറപ്പില്ലെന്നും അത് ഒരു നിശ്ചിത പരിധിക്കപ്പുറം പോയിട്ടില്ലെന്ന് താന്‍ കരുതുന്നുവെന്നും അവര്‍ പറഞ്ഞു. പക്ഷേ, തീര്‍ച്ചയായും, ആര്‍ബിഐയും വില നിരീക്ഷിക്കുന്നുണ്ടെന്നും മന്ത്രി വ്യക്തമാക്കി. പുതിയ താരിഫ് സംബന്ധിച്ച ആശങ്കകള്‍ക്കിടയില്‍ ആഗോള പ്രവണതകളെ പ്രതിഫലിപ്പിക്കുന്ന സ്വര്‍ണവിലയില്‍ കുതിച്ചുചാട്ടം തുടരുകയാണ്.