കുവൈത്തില്‍ പള്ളികളിലെ പെരുന്നാള്‍ നമസ്‌കാരത്തിന് പുറമെ ഈദ് ഗാഹുകള്‍ക്കും അനുമതി

കുവൈത്ത് സിറ്റി: പള്ളികളിലെ പെരുന്നാള്‍ നമസ്‌കാരത്തിനു പുറമെ കുവൈത്തില്‍ ഈദ് ഗാഹുകള്‍ക്കും അനുമതി നല്‍കി ഔകാഫ് മന്ത്രാലയം. ഈ വര്‍ഷം, യുവജന കേന്ദ്രങ്ങളിലും ചത്വരങ്ങളിലും പ്രത്യേക ഈദ് മുസല്ലകള്‍ അനുവദിക്കുമെന്നും ഔകാഫ് മന്ത്രി ഈസാ അല്‍ കന്ദരി അറിയിച്ചു. ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്.

ഈദ് ഗാഹുകള്‍ക്കും ഇക്കുറി അനുമതി ഉണ്ടാവുമെന്ന് പറഞ്ഞ മന്ത്രി, പ്രവാചകചര്യ പിന്തുടരുന്നതിന്റെ ഭാഗമായാണ് തീരുമാനമെന്നും വ്യക്തമാക്കി. ഔകാഫ് മന്ത്രാലയം നിശ്ചയിക്കുന്ന യുവജന കേന്ദ്രങ്ങളിലും, സ്‌പോര്‍ട്‌സ് സെന്ററുകളിലും മൈതാനങ്ങളിലുമായിരിക്കും ഈദ് ഗാഹുകള്‍ നടക്കുക. ഇതുസംബന്ധിച്ച വിശദമായ ഷെഡ്യൂള്‍ ഔകാഫ് മന്ത്രാലയം പിന്നീട് പുറത്തിറക്കും. കഴിഞ്ഞ വര്‍ഷം ആറ് ഗവര്‍ണറേറ്റുകളിലായി 30 കേന്ദ്രങ്ങളിലാണ് ഈദ് ഗാഹിന് ഔകാഫ് സൗകര്യമൊരുക്കിയിരുന്നത്.